李龙基自爆一生不缺女伴屋企对四面墙好难受硬撑65日曾万念俱灰：惊自己过唔到

2024-04-22 06:00

李龙基细36年嘅未婚妻（Chris）王青霞，因涉逾期居留、使用虚假文书等被控7宗罪，现已还押于大榄女惩教所65日，案件押后至5月28日再讯。曾扬言唔再接受传媒访问的基哥近日突然变得高调，继上周现身梁思浩主持的网台节目《娱乐好好玩》后，上周4晚再接受颜联武主持嘅网台D100节目《霎时冲动》访问，节目中大谈对王青霞还柙后嘅心历路程，认为搞成咁系上天安排，考验他情比金坚。最爆当提及经典歌《It\'s a sin to tell a lie》，基哥更直言讲大话系罪过，对于「两公婆」被指系「大话精」，基哥淡定地自辩道：「我讲唔讲大话，我永远觉得个天知、地知、我自己知...」访问尾声，颜联武用网民留言「自编自导自演」作结，获网民大赞主持人访问技巧高，充满智慧，句句诱导受访者讲出真相。

基哥接受资深DJ颜联武访问。

访问喺上周4晚网台D100节目《霎时冲动》播出。

节目中基哥变开笼雀。

又破晒例讲王青霞。

颜联武追问基哥一啲深入话题。

基哥讲乜吓亲颜生？

基哥否认自己满口谎言。

李龙基直言讲大话系罪过。

网民大赞颜联武访问技巧高。

对李龙基答案唔收货。

颜联武系网台D100金牌主持。

有把靓声嘅颜联武无论唱歌、主持及配音都掂。

上周基哥现身梁思浩主持的网台节目《娱乐好好玩》。

万念俱灰惊过唔到
李龙基不忘在节目中宣传创作嘅新歌《云淡风轻》，表示系唱出心声：「今时今日活到呢个年纪够啦，要去Enjoy，唔好去冲，以前一晚走8场骚搞到瞓唔著，医生话我精神崩紧到喺悬崖边。」但他否认为𠵱家经历而写，又表示绝对信命，觉得唔好刻意去改变命运安排：「估都估唔到上天开呢个玩笑，初时好难受，反问点解会咁呢？相信系一个考验，我要好努力咁去适应。」颜联武追问他可有感到忧虑及恐惧？基哥直认有好多未知数会感到忧虑。基哥话自己从来都系一个好豁达嘅人，但呢段日子也曾乱过阵脚：「活到今时今日70多年 (73岁)，忽然有咁嘅事发生真系会乱，乱到有一个星期瞓唔到食唔到，做人好似冇晒目的唔想做人咁，万念俱灰都惊自己过唔到。」他又向颜生承认一生都有女伴，从来未试过返屋企对住四面墙：「所以命运安排好得意，同王青霞2011年相识，边度都同佢周围去...好彩好快冷静，谂清楚楚应该做乜唔做乜，(有冇反省点解会搞成咁？)有㗎，我只得一个答案，系上天安排，可能系上天安排嘅一个考验，考验我情比金坚，其实我好锺意张德兰嘅《情义两心坚》。」

吹口琴拍新歌《云淡风轻》MV。

基哥新歌《云淡风轻》有份作曲。

基哥认为上天正考验跟王青霞嘅感情。

王青霞官非令基哥头痛。

多年来基哥跟王青霞有影皆双。

李龙基保证唔会掉低Chris。

年前基哥高调陪Chris送画畀杨梓菁。

王青霞为《三生有幸经典演唱会》画画。

两人形影不离。

基哥早于2011年已认识王青霞。

谎言应该早被发觉
他又指近日多咗时间独留家中，便拿出结他自弹自唱英文歌，基哥自爆：「卢宛茵教识我听《It\'s a sin to tell a lie》，讲大话系罪。」颜联武则打蛇随棍上追住问：「但睇留言话你系讲大话嘅人，你点睇呢句？」基哥不慌不忙回应：「其实到我呢个年纪心态觉得冇乜所谓啦，因为佢哋唔认识我，都系估我系咁，佢估啫唔系真嘛，我讲唔讲大话，我永远觉得个天知、地知、我自己知，若然我成日讲大话，正如某巨星(甄妮)讲过话我『好锺意讲大话扮猪食老虎』，我喺呢行几十年生涯，(讲大话)应该一早畀人发觉咗，唔𠵱家先发觉，真理冇需要辩...」颜联武再问他事件中有何体会？基哥又引用口头禅：「我唔系讲大话，我对住灯火讲，我发觉身边嘅系真真正正朋友，有个加拿大返嚟朋友返嚟渡假，喺酒店见面同我倾偈时对住我喊，呢啲朋友去边度搵？所以好感恩身边有好多好好朋友，好感恩身边朋友成日打嚟问候鼓励及安慰我，叫我出嚟饮茶，识朋友中冇一个要保持距离，前港姐林颖娴返嚟都同我食饭。」