香胤宅自嘲表達能力差享受被鞭策《造星V》結緣被張銘耀靠惡點醒開舞劇丨獨家

2024-04-02 07:00

《全民造星V》冠軍香胤宅（Lyman）將於5月舉行首個個人舞蹈劇場《Unspoken》，並由《造星V》導師張銘耀（German）監製及導演。兩人在比賽尾聲變熟絡，Lyman形容自己如主題「Unspoken」一樣不懂表達，German就似「開鎖佬」打開他的內心世界。講到未來發展，Lyman坦認跟ViuTV仍未簽約，雙方正磨合中，關係仍然友好。採訪：杜杜攝影：朱偉彥髮型:@Wesker_work 化妝:Karla Choi 服裝:Harvey Nichols

Lyman面對12場演出未算太大壓力，因German及團隊令他很放心。

兩人在《造星V》結緣，German笑指當時經常兇Lyman，「比起其他人我對佢更harsh，佢有經驗，睇過個世界有乜嘢，我當然知道佢有啲hesitation，佢唔係平時嘅拉丁舞老師、排舞師，唔可以用呢個身份同其他仔合作，大家一齊比賽，見到佢有時留手、有時會計吓，冇咁純粹，咁我就推佢行，去到有個位我對佢係惡死㗎！」

拍照時，貪玩Lyman逼不擅於跳舞的German一齊跳。

Lyman跟German亦師亦友，話題天南地北，他們笑指只差不知對方着咩底褲。

German笑Lyman做戇居事

《Unspoken》的誕生，German認為蘊釀於跟Lyman研究《造星V》入10強前的表演，「有日我惡完佢，喺電話話『如果你想知更多，你嚟搵我』，結果佢真係打畀我。」當時他們跟Rosa好認真傾，希望Lyman能突破自己，不要再被任何枷鎖縛住，German說：「我哋成日講見唔到真正嘅佢，結果完咗個talk，唔係我哋功勞，係佢自己好努力咁排，結果得到好似個鎖鎖住自己嘅表演（《imPerfect》），我同Rosa好感動，挑戰自己講就易，咁短時間，喺比賽挑戰自己係件幾戇居嘅事，哈哈！」

Lyman憑《imPerfect》突破演出，成功打入《造星V》10強。

自此兩人建立了好關係，Lyman比賽後就未來發展，繼續問German意見，而對於German對他惡，Lyman完全唔覺，「唔覺得佢係harsh，我覺得係需要，我表達唔到，我要人哋真係篤我，搲我，撩啲嘢，問啲啱嘅問題。」結論是Lyman屬於舞台，German說：「當然佢可以繼續喺影視，但以舞台行先，舞台唔一定做戲，跳舞都得㗎，係條好好嘅路，結果有人link up我哋做呢個騷，將呢個諗法發展出嚟！」Lyman笑指創作過程時兩人乜都傾，「由general嘅topic，越傾就講起老婆、family、兄弟姐妹、history咁樣，盡情講晒想講啲嘢出嚟，係篤啱位撩啱位，篤篤吓就出現咗呢個topic『Unspoken』，我表達能力唔係咁好，有好多嘢想講，但係講唔到出嚟。」

German為個騷諗到頭爆，工作室貼滿紙條。

自小習舞的Lyman，在英國讀大學時才發現跳舞才能表達自我。

Lyman自爆聖誕食肥咗，已減糖做gym修身，訪問時可照食水餃肉燥撈麵。

Lyman讚太太擅於「開鎖」

Lyman坦認若非跟German合作，未必有信心籌備這次演出，「係啱人囉！佢撩到嘢。」他形容German就好像「開鎖佬」，將他想表達的內心世界呈現出來，「唔係人人開到㗎，我係幾難同人真真正正溝通㗎！」Lyman表示另一擅於為他開鎖的人就是太太Zoe ，「佢係開鎖、開門，同埋閂門嘅人，有啲位佢會叫我唔好再諗，會stop我，佢知道我開咗門，可能會不停咁loop，佢就知道閂咗佢。」German認為Lyman身上有太多文化衝擊，要為他「開鎖」並非難而是複雜，「佢有啲時候都未知有鎖，甚至未知有門，當然唔代表佢有問題。」

2020年Lyman和Zoe已結婚，去年正式擺酒行禮。

《Unspoken》是以舞蹈、音樂、錄像和舞台效果構成的舞蹈劇場，German認為在香港並非罕有，但以Lyman這身份演出則較少，「今次可能會吸引一啲未睇過呢啲嘢嘅人，對佢哋係好新嘅事。」Lyman不擔心觀眾睇唔明，「after我做咗《imPerfect》咁大膽，好多fans都好接受，其實佢哋知道想要啲乜嘢，係我唔識表達啫！」

Lyman染了一頭紅髮拍攝《Unspoken》海報。

Lyman日前為《Unspoken》的錄像部份進行拍攝。

《造星V》後，Lyman一直表示有意簽ViuTV繼續合作，但目前仍未動筆，他解釋雙方仍需要時間磨合，「Viu都好照顧我，會畀啲廣告我，我一早講咗畀佢哋聽，鍾意跳舞多過演戲，唱歌真係麻麻哋，所以佢哋幫我搵啲工作唔好要劇本嘅，有中文劇本就要練，呢個騷正正係我鍾意嘅舞台，我哋有個好好關係，我想要乜，佢哋畀啲乜嘢我，我做唔到啲乜嘢，我會試吓。」他又否認已自組公司，另外跟ViuTV關係友好，暫無意跟其他公司合作，「我係open，好鍾意傾偈，但目前都係同Viu傾緊偈。」