香胤宅自嘲表达能力差享受被鞭策《造星V》结缘被张铭耀靠恶点醒开舞剧丨独家

2024-04-02 07:00

《全民造星V》冠军香胤宅（Lyman）将于5月举行首个个人舞蹈剧场《Unspoken》，并由《造星V》导师张铭耀（German）监制及导演。两人在比赛尾声变熟络，Lyman形容自己如主题「Unspoken」一样不懂表达，German就似「开锁佬」打开他的内心世界。讲到未来发展，Lyman坦认跟ViuTV仍未签约，双方正磨合中，关系仍然友好。采访：杜杜摄影：朱伟彦发型:@Wesker_work 化妆:Karla Choi 服装:Harvey Nichols

Lyman面对12场演出未算太大压力，因German及团队令他很放心。

两人在《造星V》结缘，German笑指当时经常凶Lyman，「比起其他人我对佢更harsh，佢有经验，睇过个世界有乜嘢，我当然知道佢有啲hesitation，佢唔系平时嘅拉丁舞老师、排舞师，唔可以用呢个身份同其他仔合作，大家一齐比赛，见到佢有时留手、有时会计吓，冇咁纯粹，咁我就推佢行，去到有个位我对佢系恶死㗎！」

拍照时，贪玩Lyman逼不擅于跳舞的German一齐跳。

Lyman跟German亦师亦友，话题天南地北，他们笑指只差不知对方着咩底裤。

German笑Lyman做戆居事

《Unspoken》的诞生，German认为蕴酿于跟Lyman研究《造星V》入10强前的表演，「有日我恶完佢，喺电话话『如果你想知更多，你嚟搵我』，结果佢真系打畀我。」当时他们跟Rosa好认真倾，希望Lyman能突破自己，不要再被任何枷锁缚住，German说：「我哋成日讲见唔到真正嘅佢，结果完咗个talk，唔系我哋功劳，系佢自己好努力咁排，结果得到好似个锁锁住自己嘅表演（《imPerfect》），我同Rosa好感动，挑战自己讲就易，咁短时间，喺比赛挑战自己系件几戆居嘅事，哈哈！」

Lyman凭《imPerfect》突破演出，成功打入《造星V》10强。

自此两人建立了好关系，Lyman比赛后就未来发展，继续问German意见，而对于German对他恶，Lyman完全唔觉，「唔觉得佢系harsh，我觉得系需要，我表达唔到，我要人哋真系笃我，搲我，撩啲嘢，问啲啱嘅问题。」结论是Lyman属于舞台，German说：「当然佢可以继续喺影视，但以舞台行先，舞台唔一定做戏，跳舞都得㗎，系条好好嘅路，结果有人link up我哋做呢个骚，将呢个谂法发展出嚟！」Lyman笑指创作过程时两人乜都倾，「由general嘅topic，越倾就讲起老婆、family、兄弟姐妹、history咁样，尽情讲晒想讲啲嘢出嚟，系笃啱位撩啱位，笃笃吓就出现咗呢个topic『Unspoken』，我表达能力唔系咁好，有好多嘢想讲，但系讲唔到出嚟。」

German为个骚谂到头爆，工作室贴满纸条。

自小习舞的Lyman，在英国读大学时才发现跳舞才能表达自我。

Lyman自爆圣诞食肥咗，已减糖做gym修身，访问时可照食水饺肉燥捞面。

Lyman赞太太擅于「开锁」

Lyman坦认若非跟German合作，未必有信心筹备这次演出，「系啱人罗！佢撩到嘢。」他形容German就好像「开锁佬」，将他想表达的内心世界呈现出来，「唔系人人开到㗎，我系几难同人真真正正沟通㗎！」Lyman表示另一擅于为他开锁的人就是太太Zoe ，「佢系开锁、开门，同埋闩门嘅人，有啲位佢会叫我唔好再谂，会stop我，佢知道我开咗门，可能会不停咁loop，佢就知道闩咗佢。」German认为Lyman身上有太多文化冲击，要为他「开锁」并非难而是复杂，「佢有啲时候都未知有锁，甚至未知有门，当然唔代表佢有问题。」

2020年Lyman和Zoe已结婚，去年正式摆酒行礼。

《Unspoken》是以舞蹈、音乐、录像和舞台效果构成的舞蹈剧场，German认为在香港并非罕有，但以Lyman这身份演出则较少，「今次可能会吸引一啲未睇过呢啲嘢嘅人，对佢哋系好新嘅事。」Lyman不担心观众睇唔明，「after我做咗《imPerfect》咁大胆，好多fans都好接受，其实佢哋知道想要啲乜嘢，系我唔识表达啫！」

Lyman染了一头红发拍摄《Unspoken》海报。

Lyman日前为《Unspoken》的录像部份进行拍摄。

《造星V》后，Lyman一直表示有意签ViuTV继续合作，但目前仍未动笔，他解释双方仍需要时间磨合，「Viu都好照顾我，会畀啲广告我，我一早讲咗畀佢哋听，锺意跳舞多过演戏，唱歌真系麻麻哋，所以佢哋帮我搵啲工作唔好要剧本嘅，有中文剧本就要练，呢个骚正正系我锺意嘅舞台，我哋有个好好关系，我想要乜，佢哋畀啲乜嘢我，我做唔到啲乜嘢，我会试吓。」他又否认已自组公司，另外跟ViuTV关系友好，暂无意跟其他公司合作，「我系open，好锺意倾偈，但目前都系同Viu倾紧偈。」