黃建東變身網上飲食KOL搵真銀儲夠首期想買1000萬樓做業主丨獨家

2024-02-29 07:00

黃建東於2022年奪得全能司儀選拔大賽冠軍，又擔任過幾次大騷司儀，令他對做主持信心大增，加上一向愛飲飲食食，決定在網台開飲食節目《東eat》。踏入龍年，東東望靠網台確立「為食東」飲食KOL形象搵真銀，仲有大騷司儀長做長有，最想自己孭飛主持節目。採訪：杜杜攝影：錢文坤髮型:Jack Hung @ Dazzle Hair 場地:The AIR (The ONE)

東東帶病做訪問，新年願望除了搵錢、多桃花，最重要身體健康。

為食東東笑言早已放棄減肥大計，所以去年底決心開網上節目《東eat》講飲講食，「之前做《鄰住買》直播，我賣食品係好賣到，啲人見到我食就會好想食，我唔係扮出嚟，係從心而發，酸菜魚真係成碟食晒，希望《東eat》拍多啲食嘢片，發展成為飲食KOL。」4年前他為爆乳老闆娘剪綵報導在網上翻hit，令東東更有信心搶流量，「2個月前有網站再post出嚟，新聞去埋內地同台灣，我就食住個勢拉埋老闆娘一齊講吓食，冇宣傳下都有20萬點擊。」

東東4年前為爆乳老闆娘剪綵報導在網上翻hit。

東東在個人頻道推出《東eat》，訪問爆乳老闆娘片超過21萬點擊。

恨擔大旗主持感性節目

司儀大賽奪冠後，東東做過台慶、東華及仁濟等大騷司儀，新1年希望可以做更多，甚至可以擔大旗主持節目，而除了擅長講飲食外，還想玩感性，「係時候轉一轉形象，做啲感性啲嘅節目，訪問一啲社會上被忽略嘅人，了解多啲基層嘅故事，喺電視播，大家會更加關注佢哋，幫到佢哋。」其實他平日都愛做義工，「自己有能力就探訪多啲公公婆婆，或者有需要嘅朋友，送多啲溫暖畀佢哋。」