黄建东变身网上饮食KOL搵真银储够首期想买1000万楼做业主丨独家

2024-02-29 07:00

黄建东于2022年夺得全能司仪选拔大赛冠军，又担任过几次大骚司仪，令他对做主持信心大增，加上一向爱饮饮食食，决定在网台开饮食节目《东eat》。踏入龙年，东东望靠网台确立「为食东」饮食KOL形象搵真银，仲有大骚司仪长做长有，最想自己孭飞主持节目。采访：杜杜摄影：钱文坤发型:Jack Hung @ Dazzle Hair 场地:The AIR (The ONE)

东东带病做访问，新年愿望除了搵钱、多桃花，最重要身体健康。

为食东东笑言早已放弃减肥大计，所以去年底决心开网上节目《东eat》讲饮讲食，「之前做《邻住买》直播，我卖食品系好卖到，啲人见到我食就会好想食，我唔系扮出嚟，系从心而发，酸菜鱼真系成碟食晒，希望《东eat》拍多啲食嘢片，发展成为饮食KOL。」4年前他为爆乳老板娘剪彩报导在网上翻hit，令东东更有信心抢流量，「2个月前有网站再post出嚟，新闻去埋内地同台湾，我就食住个势拉埋老板娘一齐讲吓食，冇宣传下都有20万点击。」

东东4年前为爆乳老板娘剪彩报导在网上翻hit。

东东在个人频道推出《东eat》，访问爆乳老板娘片超过21万点击。

恨担大旗主持感性节目

司仪大赛夺冠后，东东做过台庆、东华及仁济等大骚司仪，新1年希望可以做更多，甚至可以担大旗主持节目，而除了擅长讲饮食外，还想玩感性，「系时候转一转形象，做啲感性啲嘅节目，访问一啲社会上被忽略嘅人，了解多啲基层嘅故事，喺电视播，大家会更加关注佢哋，帮到佢哋。」其实他平日都爱做义工，「自己有能力就探访多啲公公婆婆，或者有需要嘅朋友，送多啲温暖畀佢哋。」