黃智雯自稱少少白痴甜讚老公有勇有謀離巢乜都試呼籲想玩超辛苦真人騷丨獨家

2024-02-28 07:00

去年10月，黃智雯宣布跟拍拖11年的珠寶集團高層詹文天（Anthony）結婚，12月再公布跟TVB結束16年賓主關係。龍年開始人生新階段，詹太最想多參與電影及綜藝，仲話唔怕辛苦，最想玩真人騷。已成人妻的她更有別過往，將老公掛口邊，冧讚對方好叻，適當時候會扮隱形，但講到生小朋友，41歲的她表示有共識唔心急做父母。採訪：杜杜攝影：朱偉彥髮型:Jay @ HoLA 化妝:諺瞳.小白服裝:self-portrait場地:The House

智雯龍年好多新開始，對首派利是特別興奮。

訪問時智雯好風騷，她坦認進入新階段心情放鬆了。

龍年願望，智雯首要想身體健康！

智雯婚後更加容光煥發。

智雯在TVB的最後劇集《再見·枕邊人》剛播出，她希望龍年身體健康，稱以往劇接劇反而更fit，工作方面，就想跟不同演員和團隊合作，特別想拍電影和綜藝，而2019年拍過真人騷《一個因去跳舞》的她，滿腦子真人騷Idea，「好想拍啲攞苦嚟辛，例如諗10個挑戰畀我，係我從來未做過，好似得1個月時間準備要爬到上山。」

智雯跟TVB最後合作的《再見·枕邊人》剛推出。

2019年的《一個因去跳舞》後，智雯愛上拍真人騷。

拍劇唔係為攞視后

智雯在TVB 16年，8度獲提名「最佳女主角」，更3度打入5強，2018年憑《三個女人一個「因》攞埋星馬雙料視后，但跟視后始終無緣，難怪離巢被解讀為TVB欠她一個視后，不過當事人卻另有想法，「獎項實在有太多因素，演員求咩啫？！想有個代表作，角色有人喜歡同共鳴。」她最喜歡的《三個女人一個「因」》就能做到，「收到好多message都話『我以前有情緒病，好唔開心，睇完個劇帶咗好多快樂同正能量畀我』，呢個就係用錢換唔到，透過角色畀到正能量觀眾，係我最想做到嘅嘢，唔係為攞獎。」該劇令她難忘，還因角色的其中一個人格「Pina Colada」，內藏她鮮為人知的熱情奔放一面，她更自爆飲大咗的怪行「飲咗少少酒，好開心，同『胡說八道』佢哋玩MMA，兩個女仔攬埋一嚿。」此一面連老公都未見過。

2018年智雯憑《三個女人一個「因」》首奪星馬雙料視后。

智雯很喜歡《三個女人一個「因」》的多重人格角色。

智雯在「胡說八道會」一班老友面前，會玩到露出真本性。

主動要求拍《隱門》

智雯承認入行16年遇過不少低潮，會不斷懷疑自己，如2012年剪短髮拍《飛虎》，「幾唔開心，點解好似重複咗，係咪越嚟越man？係咪做唔到女仔啲角色？每個階段都會有啲咁嘅糾結，去到樽頸位就係做比較多專業人士同正經角色，係咪重複緊？觀眾係咪覺得又係睇緊同一樣嘢？會有啲擔心。」遇到問題，她選擇主動向公司提出拍《隱門》，「好想試吓比較有血有肉，複雜啲角色，《隱門》開頭係個好慘好弱質嘅女仔，之後黑化變成會殺人，起伏好大，終於有個劇本好好玩。」2021年她演出鄧樹榮執導的舞台劇《超自然之戀》，對她有好大衝擊，「好鍾意同啲做開舞台劇嘅人傾偈，佢哋睇法好唔同，我好多朋友，好似『胡說八道』都係同一個圈，同吓唔同範疇嘅人傾偈，會聽到好多好得意嘅ideas。」她暫別娘家就是想求變，「舞台劇可以試好多唔同嘅嘢，自己都會有驚喜，原來我都好想求變，仲有追求嘅心。」

2012年智雯剪短髮拍《飛虎》，此後連演多個性格硬朗角色。

去年播出的《隱門》，是智雯主動要求演出。

2021年演出舞台劇《超自然之戀》，對智雯有很大衝擊。

生B有共識睇天意

婚前的智雯唔多講男友，但婚後就願意講多啲，更開行讚賞Mode停不了的狂讚，「哈哈！佢扮演聆聽者，有時又好似隱咗形，佢嘅隱形係好尊重我嘅私隱、工作模式，好支持我，叫佢睇返啲劇會有親熱鏡頭，佢都會唔睇，話冇興趣，因為呢個係我工作。」Anthony在適當時候又會充當軍師，「我咩都同佢講，譬如今次工作上咁大決定，我好跳脫想做就做，但佢比我有遠見，有鋪排，有啲準備先至行動，當然演戲範疇就冇得問佢，但日常、數字嘅嘢我會有少少白痴，會問佢意見。」新婚的她正學習在家庭和工作取平衡，好彩身邊有好多成功例子參考，「投入工作但家庭都唔可以忽略，係好難manage，（胡）杏兒、Ada（蔡少芬）或者朱茵姐姐都做得好好，都係我目標。」至於生龍年BB，她就跟老公有共識，「隨緣啦！咁多年大家都有講呢個話題，有共識唔需要有太大壓力，如果個天畀呢個禮物，當然好開心。」