獨家丨75歲秦煌有細30年深圳情人：同港女好唔同誤爆李龍基絕密情史讚偉仔有義氣

2024-01-26 07:00

林偉早前在社交網分享跟75歲秦煌(梁日成)食tea片段，坐輪椅的後者被指有好大浸「老煌味」，林偉提醒他記得返去沖涼，更指向秦煌說：「無人觸摸似廢堆」，令人感慨！育有3子一女的秦煌，多年來跟家人關係疏離，更向《頭條日報》自爆，21年前已搬往深圳居住，由相差30年的「情人知己」照顧起居，即使返港搵食，只會租住青衣Apartment獨居。另外，入行47年的秦煌跟唔少巨星合作過，大讚跟他同姓的「影帝」梁朝偉最有義氣，更唔覺意爆埋近期「花生友」至愛，老友李龍基的絕密情史。採訪：方騫平攝影：鄧國良

75歲的秦煌承認跟家人冇乜兩句。

秦煌每日會推住輪椅落樓下食tea。

行到攰就坐吓。

扶住慢行，最驚會跌親。

𠵱家生活環境勉勉強強。

醫生話唔使戒口。

落街食個Tea當散步。

林偉跟秦煌住得好近，在港就會陪對方。

秦煌、林偉住得好近。

3年前曾在電視城跌倒。

秦煌曾跌倒入院。

去年8月，秦煌完約，無聲無色離開效力44年的TVB，他相信是TVB新政策，冇得留底跟他健康冇關，亦唔會嬲，反正外面仲有嘢做，慳住使都勉強夠。雖然𠵱家要扶住行，但強調健康好咗好多：「我都ok行得好咗，呢度清靜空氣又好，你睇我冇乜老態個樣都精神啦，但我唔跌得，所以太攰會坐輪椅。」秦煌每隔4個月覆診一次，攞去水丸、降血壓藥等，他堅持：「醫生冇要求我再減肥，我都瘦咗幾十磅啦，減得太多會皺皮，點出嚟搵食呀？」

2016年奪TVB「專業演員大獎」。

《97天龍》4大惡人-李鴻傑、李麗麗、李子奇。

受傷後復出拍《王老虎搶親》。

拍過《林沖》。

跟已故翁美玲拍《射雕英雄傳》。

《鹿鼎記》中演茅十八好突出。

赤祼上身演《殭》。

和王浩然在《疊影狙擊》合作。

2002年和宣萱、陳秀珠拍《戇夫成龍》。

參與綜藝節目《獎門人》。

與少年時苗僑偉《播音人》合作。

為子女冇離婚

對於林偉的「孤獨論」，秦煌說得淡然：「子女各有家庭，大家安定就好，關係可以話ok又唔ok，雖然財政有啲窄窄地，但唔會靠佢哋養，最多叫個女幫我上網買少少嘢。」檢視跟家人疏離的原因，秦煌坦言自己溝通出錯在先，以為將個家交託畀太太(已故商台DJ莫佩雯)，子女年少時，用物質滿足就夠，唔會太關心佢哋嘅生活：「我性格係咁，拍完戲就去潛水…我同太太喺唔了解下結婚，到好了解時分開，所以生前佢對我有好多不滿，21年前索性搬去深圳，住喺朋友附近，但為咗子女冇離婚，後來結識情人知己，佢幫我洗衫煮飯。」

莫佩雯生前曾向秦煌提出6次離婚。

莫佩雯生前係商台著名DJ。

莫佩雯嘅歌曲《勁草嬌花》曾風行一時。

基哥愛爺孫戀

否認風流的秦煌對身邊女人讚不絕口：「內地女人同港女性格好唔同，唔會第一時間問你有冇錢？有幾多物業？當年佢只得20幾歲，但我經已50幾歲，所以曾叫過佢走，哈！但我趕佢都唔走，佢仲儲起買菜嘅『打斧頭』錢，加埋我畀佢嗰幾十萬，喺佢家鄉湖南買埋樓，第日我做完嘢返深圳定居，佢會坐高鐵過來。」提到內地樓，秦煌即聯想到呢排好頭痕的老友李龍基：「佢用80萬購入福田1300呎物業時，我曾去參觀，當時佢個女友都係好後生，我仲以為同𠵱家嗰個係同一個人，點知發覺唔同樣，哈哈…(都係爺孫戀)冇物業邊有香港女仔睬你呀？」

秦煌爆李龍基情史，稱他跟「嫩妻」發展前都是玩「爺孫戀」。

偉仔送花問候

秦煌又大談和梁朝偉的淵源：「佢喺訓練班實習時演酒店侍應，試過唔小心跣手將杯內牛奶倒到我一身都係，當時佢好驚，我反過來安慰佢『唔係有心，唔會鬧你』，之後拍《大運河》開始friend咗，後期拍《倚天屠龍記》時佢已劇接劇冇時停，睇見佢冇得唞都心痛。」他又指偉仔有少爺仔脾性，搵到錢就鍾意使錢：「佢唔會去平民酒樓食飯，當年飲餐茶花千幾蚊，就算紅咗嘅發哥都踎大排檔啦。」偉仔對秦煌好好，食飯會畀埋佢份錢，2008年秦煌在長洲乘船時跌倒墮海送院，偉仔署名Tony Leung送上花籃問候：「我唔知佢叫Tony Leung，係啲姑娘話返我知，個個都好興奮咁同花籃打卡」

秦煌睇住偉仔由訓練班做到小生。

梁朝偉拍過《倚天屠龍記》。

有型朝偉。

2008年長洲墮海昏迷。

2008年，秦煌曾墮海重傷昏迷，李家聲、羅樂林到醫院探望。

至於《踩過界》中的「阿女」蔡思貝，秦煌讚她一點就明。對於「阿女」曾經緋聞纏身，秦煌即幫口：「咁女仔唔使識男仔？佢鬼妹嚟嘛！(尤其跟人夫王浩信扯上關係?)咁梗係要怪個男人媾女啦！」另外，他又爆黃日華以前花名叫「噴火華」，經常和導演嗌交：「佢性格係咁真係冇得改，連踢波都會踢人係咪噴火呢？」而合作過《鹿鼎記1998》的陳小春都係義氣仔女：「我朋友搵佢唱歌，點知佢回電劈頭就問『話我聽係咪有人恰你？我同你搞掂佢！』」