古天后日誌｜港股雖有反彈條件 還看A股能否喘定

1月18日，大致多雲，初時有一兩陣驟雨，日間部份時間有陽光。市場對全球主要央行減息預期降溫，加上美國零售數據強勁，美債息繼續向上，升至4.1268厘，息口敏感度較高嘅2年債息更升至4.3671厘。美股周三繼續向下，反映中國概念股嘅金龍指數則下跌2.59%。不過港股於ADR靠穩，夜期及黑期亦未有跟隨金龍指數再向下。

不要對企業業績存過份憧憬

雖然聯儲局及歐洲央行官員紛紛淡化短期減息嘅可能，但未有排除今年會減息，唔少華爾街大行近期唱好美股前景。瑞銀將標指今年預測目標上調6%至5150點，主要基於聯儲局減息預期及今年企業經調整每股盈利增長高於趨勢水平。

商品市場方面，紅海危機大幅減弱原油及天然氣運輸能力，但油價並沒出現預期中嘅強力反彈，反映市場對經濟前景信心有限，預期需求減少，因此暫時唔應該對企業業績存在過份憧憬。事實上，中美製造業PMI再度轉入收縮，環球經濟沒預期中理想，但美股卻接近歷史高位，目前美股未夠值博率。

傳阿爺打算開徵資本增值稅

A股方面，市傳阿爺打算開徵資本增值稅，市場擔心引發新一輪的資產拋售潮，A股出現大跌，3大指數分別跌2.09%至3%不等，兩市成交只有6374億，資金面仍然低迷，似乎A股跌至現水平，仍未見有資金入場，若然再因恐慌而出現拋售潮，A股抗跌能力有限。

港股有機會考驗15000大關

美國減息預期降溫，加上內地通縮加劇，令港股持續處於劣勢，淡友更加放肆，噚日恒指再跌近600點，一度低見15195低位，報收15277點，由踏入2024年至今12個交易日，累跌一成，有機會考驗15000大關。不過噚日港股喺下跌3.7%同時，成交放量至1300億元，反而係好事，即市今明兩日再向下試2022年低位14600水平，但喺低位成交能保持在1200億以上，反映有資金願意於現水平入場，短線或有技術反彈。

不過對於港股反彈，仍不能寄予厚望，畢竟大市已失多條移動平均線，港股由17200水平回落至15200水平，超賣下作出技術反彈，有機會只係死貓反彈，若以跌幅2000點反彈黃金比0.382計算，都只係反彈至15900至16000水平，剛好係5日線所在，若連5日線都未能修復企穩，港股短線反彈後，仍有機會再向下尋底。尤其係A股勢弱，將繼續拖累港股。

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁：https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ