古天后日誌｜港股需企穩10日線 方能保持反彈

1月4日，部份時間有陽光，早上清涼，日間乾燥。聯儲局上月議息紀錄顯示利率可能見頂，但政策路徑仍存在不定性，更有官員繼續放鷹，加上美國10年債息一度重越4%，美股隔晚受壓。三度指數下跌，道指跌284點，標指跌38點，納指跌173點。不過反映中概股嘅金龍指數則反彈1.5%，帶動夜期回升及ADR靠穩。

雖然聯儲局會議紀錄顯示利率已處於或接近峰值，經濟展望今年年底前或減息幾次，不過再有官員為利率必要喺一段時間內高企，更有官員表示再有加息可能。聯儲局蹔員又放鷹，帶動美國10年期債息續升最多7.89個基點，報4.0083%，其後轉跌超過5個基點，回落至3.9%水平；息口敏感嘅2年期債息一度漲6.02個基點，至4.3803%，其後亦偏軟。美匯指數連升四日，一度升0.5%至102.711水平，為去年11月以嚟最長升浪。美元走強下，人民幣回落至兌美元於7.15至7.16水平。今年其實係減息年，不過喺息口將轉向之際，美聯儲局都會死剩把口，唔會突然轉鴿，以出口術去繼續控制通脹，令目前對減息過度預期嘅市場大潑冷水。

本月拋售大型科技股已成市場共識

美股2024年開局失利，納指更為2001年以嚟開局最差表現，美銀有策略員表示，本月拋售大型科技股已成市場共識。另有滙豐策略員指出，市場對對經濟軟着陸嘅樂觀情緒正逆轉，相信風險資產升勢暫告一段落，更將美股評級降至策略性減持。上月美股資金已開始由一線股轉炒二三線股份，劣幣驅逐良幣嘅情況短期見頂亦屬正常。尤其當標指升至4,800水平接近歷史高位，企業盈利尚未回升但估值已出現溢價，高位先入場係有需要透支明年潛在升幅，風險自然較高。暫時美國經濟傾向打橫發展，企業盈利係小幅抑或大幅回升仍有不確定性，美股喺高位減磅無可厚非，資金亦由科技股換去舊經濟股，待回調吸納較具勝算。

至於中港股市方面，A股估值偏低，外資開始轉沽為買，但陸資喺缺水情況下持續沽貨，令A股跌跌不止。內房爆雷後，阿爺若不能穩住樓價，係好難令經濟復甦進度加快。房屋係大部份民眾嘅最後及最重要資產，民眾要套現周轉，當然係自選擇沽出股票，呢個亦係對A股構成巨大沽壓嘅原因。

而港股喺整個12月份，基本上係16,500點水平上下500點上落，目前仍未走出呢個間，成交持續低迷，反映入場資金有限，根本無人問津。大戶炒上炒落劏牛殺熊，暫未有確實方向。港股24年開局連跌兩日，恒指昨收16,646點，昨晚夜跟ADR未有跟隨美股下跌，今日港股有望反彈，若大市能重上10日線16,680點企穩，有望進一步回試5日線水平，即16,800點，甚至50日線17,000點區域，大前題係20日線16,580點不容有失。

---
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ