古天后日誌｜港股續回調需守10日線

再有大行唱好美股，雖然有聯儲局官員繼續淡化市場，美股隔晚窄幅上落，但仍處於高位徘徊。道指隔晚靠穩，升不足一點，但標指一度升0.64%，與歷史紀錄相差不足2%，收市報4,740，升21點；納指最多漲0.84%，收市升90點，連升八個交易日。不過反映中國概念股表現嘅金龍指數回吐0.93%，港股夜期跟ADR亦偏軟，重返16,500水平。

再有消息指內地國企及政府部門限制員工使用iPhone，蘋果公司股價一度跌1.6%，收市跌幅收窄至0.9%；但其他重磅股表現不俗，其中Netflix抽高3%，Meta亦升2.9%。寶潔（P & G）升1.5%，為升幅最大道指成份股。

美股持續高企，牛氣沖天，再有大行唱好美股，當中高盛急急腳上調2024年美股預測，將標指目標由原先4,700，調高近9%至5,100，以反映美股更佳前景。其分析員David Kostin指通脹回落及聯儲局減息將使到實質孳息維持低企，並對股市估值帶來支持。雖然今年貨幣市場基金吸資達1.4萬億美元，拋離美股基金950億美元淨買額，但相信當聯儲局開始減息，部分現金將重返股市。另一位一直睇淡美股嘅大摩分析員Michael Wilson亦轉軚，表示聯儲局「放鴿」顯示局方希望確保經濟軟着陸，認為係利好股市的嘅訊號。

美國鋼鐵接納日本製鐵提出金額達141億美元的收購建議，刺激股價跳升26.1%，收購作價1倍PB，估值合理。反映美股雖然高企，但當中仍不乏估值合理嘅潛力股，資金喺舊經濟板塊之中尋寶。而從另一角度睇，沉睡已久嘅日本企業開始甦醒，向外尋找投資機會。

至於中國呢邊，出口不景氣，但未能靠內需激活經濟，主要係過去幾年內地樓市不濟，出現財富負效應，內地經濟喺疫情後未能復甦，從本年公布嘅經濟數字可以睇得一清二楚。A股表現每況愈下，港股揋現亦不濟，上周五反彈至萬七水平又無影，噚日回吐至16,600水平，但隔晚夜期跟ADR偏軟，重返16,500水平，頂計今日港股又低開，5日線16,504已升穿10日線16,424，出現首個黃金交叉，港股今日繼續回調，必需要守呢兩條線，先有機會喺本月餘下時間再度重返20日線16,901及挑戰50日線17,288。

---
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ