古天后日誌｜恒指連跌四個月 12月反彈機會較大

12月1日，大致多雲，初時有一兩陣微雨，日間部份時間有陽光，天色晴朗及乾燥。美國最新數據顯示經濟和通脹持續降溫，美國核心PCE環比上漲0.2%，符合預期，核心PCE正向2.5%進發，增強市場對聯儲局提早放鬆貨幣政策嘅信心。喺美國銀行股有買盤向上帶動下，道指升520點。不過有兩位美聯儲委員出來放鷹，表明唔考慮減息，10年債息反彈，科技股受壓，標指仍有17點升幅，但納指則跌32點。目前美股貪婪指數已升至66，距離75嘅極度貪婪仍有空間，不過美股目估值偏高，標指4,600點阻力唔細。

Tesla正式開售金Cybertruck，反而係好消息出貨，股價跌1.66%，250美元成為短期阻力。Tesla作為科技龍頭指標之一，再加埋另一龍頭Nvidia回落2.85%，自拖低其他科技股。另一方面，Facebook母企META受歐美機構提控，股價升破近期高位後見壓力。

睇返從油價走勢，以及中美嘅PMI數據，反映環球經濟走出谷底，但唔講得上係強勁復甦，美國第3季度GDP雖高達5.2%，但估計Q4及明年上半年，可能要回落至1%至2%附近，走向平穩，目前環球經濟發展仍有待觀察。

缺乏歐美資金

至於港股真係不提也罷，11月幾乎全球股市回升，港股仍要跌，由年初至今跌足11個月。恒指連續兩日回試17,000點，跌至呢個水平又見買盤入場低吸，連續兩個交易日成交額超過1,300億元，不過噚日有300至400億元為MSCI rebalancing，但至少見到低位有錢肯入場買吓嘢。目前港股最大問題是歐美資金一去無回頭，缺少咗呢一方面嘅資金，都咪話唔頭痕。

不過個別板塊仍有資金吸納，只要望望生科股股價，大部份股份股價其實處於恒指19,000點水平，反映呢個板塊一直有資金持貨買貨，遠遠跑贏大市表現，之前古天后都有提過，板塊中嘅心意股份，包括信達生物（1801）、康方（9926）及榮昌（9995）都係值得達低收集嘅股份。美國見有生科企業合拼，其實唔少生科股經過去年大屠殺後，估值唔單止合理，甚至係便宜，自6月中美股中已出現多次拼購案例，證明被低估生科股有潛在價值。

講返指數方面，恒指喺11月兩次挑戰18,000點無功而還，月中之後急速回調，恒指喺11月底更創今年新低16,863點，最終收市回升49點報17,042點，整個月計倒跌70點，連跌4個月累計跌逾3,000點，而恒指過去兩年兩次連跌4個月之後皆反彈，並連續返彈兩三個月，今次第三次睇係咪案件重演，咁12月回升機會較大。今日踏入12月首個交易日，即市恒指重要支持為16,950點及16,800點，反彈阻力17,150點至17,200點。

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ