獨家丨AK認有壓力會瞓身謝票狂谷票房《七月》首做男一戲劇老師埋位前特訓

2023-09-09 07:00

AK@MIRROR（江𤒹生）在靈異新戲《七月返歸》首做男一，導演謝家祺讚AK準備充足，成功踢走20多位對手做主角。為配合角色，AK極速減肥，埋位前又投入「黐線佬」狀態。笑言有票房壓力的他，講明會瞓身謝票谷票房。採訪：杜杜攝影：羅安強造型:PIPA Creative(AK) 髮型:Lorraine Lam@HairCulture(AK) 化妝:Yumi Cheung@Annie G. Chan Makeup Centre (AK)服裝:Y-3、Giuseppe Zanotti(AK) 場地:太子酒店

AK在戲中極殘，事前冇刻意唔瞓搞殘自己，「唔使特登唔瞓覺，嗰時每日得幾個鐘休息，本身都冇乜時間瞓。」

導演謝家祺曾以「中環塔倫天奴」和「離奇家遮」筆名，推出過7本小說，自小沉迷恐怖片的他，一直有研究將最愛的靈異故事拍成電影，因深信「靈異故事的普世價值較ETV更有教育意義」，他希望透過《七月返歸》帶出訊息，「係咪要好似有陰陽眼嘅人一樣，將一啲嘢視而不見」。

導演本是作家，《七月》是他首次執導的電影。

導演謝家祺大讚AK做足準備試鏡，表現令他很深刻。

為爭角色搵老師特訓

謝導搵了20多位跟AK年齡層接近的演員試鏡，最終揀了AK飾演男一「向榮」，全因他有備而來，「我哋認識佢係個好多嘢講，好陽光、好有義氣嘅人，當時佢想做一個佢覺得嘅『向榮』，好沉鬱，同世界保持距離，佢講恐怖經歷，講到好似朋友經歷，用角色嘅身份同我傾偈，覺得佢可以發展落去。」

「向榮」性格跟AK相差好遠，他覺得特別有挑戰性。

AK笑言要打低對手好難，「嘩！啲對手都係Tom Holland，好難爭返嚟，哈哈！講笑咋！覺得傾偈令到監製同導演印象比較深刻。」他承認為爭取角色花了整個星期，「『向榮』跟『關志浩』（《打天下》）同『歐陽駿』（《繩角》）好唔同，呢兩個角色某程度上係導演覺得似我，先至搵AK去拍，但我喺『向榮』搵唔到AK影子，好有挑戰性，收到劇本就即刻搵戲劇老師，睇吓試鏡前點樣準備。」

AK為演繹情緒波動戲份，埋位前會做呼吸練習。

AK笑言小演員的演戲經驗較他豐富，表現好專業。

自爆屋企扮動漫人物

為更易投入「向榮」的世界，AK努力在兩人之間發掘共通點，「都係擇善，堅持啱嘅嘢，唔會逃避，會去解決問題，將呢啲特質盡量放大擺喺自己身上，然後再加啲幻想去呈現。」此外，他又要極速減磅，「導演想個角色因為多嘢諗、多嘢煩，要瘦弱返少少，嗰時啱啱完咗《繩角》特登減磅，食少啲嘢，我估減咗3、4磅。」

拍《七月》時正值炎夏，又要長期在密封工廈拍攝，台前幕後都相當辛苦。

AK操肌拍劇集《繩角》，接着要極速減磅拍《七月》。

AK有大量場口要靠幻想演繹，作為動漫及綠幕電影迷唔算困難，因「訓練」有素，「我真係成日喺屋企扮佢哋㗎！哈哈！（導演忍唔住笑）所以應付到幻想世界呈現出嚟嘅嘢，最難反而要做不同程度的驚嚇反應。」另外，AK每日埋位前要跟戲劇導師做特訓亦好難忘，「好似個黐線佬咁企埋一邊做呼吸練習，然後老師會幫我進入狀態，佢會不停喺我耳邊講一啲『向榮』發生咗或者嚟緊要面對嘅嘢，再加自己嘅幻想，個moment幾特別，你要好專注但同時要接收唔同資訊，係個幾好嘅體驗。」

AK首次跟國際級影星白靈合作，好兄弟Lokman和Alton亦有去探班。

短期內唔再投資生意

隊友Anson Lo擔正的電影《釀魂》同期上映，由於同樣是靈異題材難免有比較，AK以一貫幽默回應，「我覺得佢哋好攰囉！咁都要攞嚟比較，雖然都係講靈異嘢，但我睇過阿Lo嗰套Trailer，我覺得大家嘅方向同意思唔同，唔需要比較，兩套都睇晒就可以啦！」問到首次擔正有否票房壓力？他繼續搞笑，「唉！你咁樣問，啱啱又話要比較喎！你咁樣問我梗係有壓力啦！但我同佢哋講，我絕對唔係帶貨嗰批，會盡力幫手。」他強調時間許可一定會謝票，親自答謝觀眾，「可以偷偷哋望出去睇吓大家反應，我鍾意咁樣，我喺紐約（出席紐約亞洲電影節）都唔係好專心睇，睇某啲位會唔會驚呀？會唔會有反應？」

講到《七月》被拿來跟隊友AL主演電影作比較，AK以一貫幽默態度回應。

AL擔正電影《釀魂》同期上映，同樣是靈異題材。

講到同Jer（柳應廷）及ERROR肥仔（梁業）合資的日本餐廳，以及哥哥合資的日式甜品店相繼結業，問到有否損手離場時，AK鬼馬地望一望自己對手，「冇事，乾淨隻手。」他坦言未有嚇親，但短期內會專注演藝工作，「又未去到怕，但都係一個經驗值，經一事長一智，今次汲取咗經驗，下次再做好啲，但短期內就未必再投資。」