古天后日誌｜中港股市缺新資金流入 僅餘一潭死水
2023-09-06 11:11 
9月6日，短暫時間有陽光，間中有幾陣驟雨，稍後局部地區有雷暴。隔晚美股喺油價回升下走軟，油價上升令通脹有機會升溫，10年債息重上4.27%，道指隔晚跌195點；標指跌18點；納指跌10點。今個星期無乜重要數據，下周三會公布8月CPI數據，估計再度回升，但市場暫時預期9月暫唔會加息。雖然美股有所回調，但市場氣氛唔係太差，就好似Tesla（美：TSLA）周一跌半成後，隔晚又彈返4.7%，反映市場仍願意逢低吸納，納指喺Tesla反彈帶動下，隔晚納指僅跌10點。
大摩較早前睇淡中港股市，家下連美股都再度唱淡，出報告指下半年經濟增長不會太強勁，並認為目前美股估值過高，表示看淡美股9月及10月走勢。美銀及細摩睇法接近。另一方面，高盛卻認為美國未來12個月衰退嘅可能性，已從25%降至15%，並認為下半年經濟會慢慢向好，即係仍然睇好後市。
淡友主導市場
至於中概股回落，隔晚ADR微跌5點，夜期則微升。睇返呢兩日中港股市表現，好難說服人可以扭轉長期弱勢。周末阿爺出組合拳，周一港股反彈幅度較大，成交亦增至1,526億元，但A股升幅唔及預期中多，而且入市資金未見大增。結果周二高位乏力回吐，內地股市3大指數跌幅0.32%至0.71%不等，成交縮減至8,038億元，舊年成交平均係1萬億元以上，8,000億元算是偏低成交水平，目前A股場內資金面偏弱，外資繼周一淨買入68億元後，周二又淨流出46億元，外資根本無心坐貨，內地基金出手亦唔積極，散戶失業輸樓輸股均要套現，短期A股無新錢流入，只怕仍然係一潭死水，政策推出只對股市帶來一下刺激，如放煙花一樣。
至於港股同樣面對缺水問題，估值上係已有一定吸引力，無奈無新資金入場，空軍淡友主導市場，股價持續陰乾，短期真的看不到港股有上升希望，起碼至今未見有大量新錢流入，低位基金唔買貨，更難期望基金會高位先嚟追貨。古天后近呢兩年嘅策略都只係打游擊，個股炒作免問，只針對指數炒上落，成為喺港股生存嘅模式。不過政策市一向難炒，只有步步為營，但淡友主導市場，就算港股估值再平，都只有跟大隊，加入淡友行列。
相關文章：
最新回應