獨家丨Frankie自嘲：早3年演會做到成督屎跟強尼演音樂劇唔介意機會遲過隊友

2023-08-30 07:00

Frankie＠MIRROR（陳瑞輝）將於下月首次演出音樂劇《大象的告別式》，跟初次合作的強尼還會有感情戲。講到雖然在劇集《IT狗》、《野人老師》表現不俗，但演戲機會欠奉，觀眾都替他不值，Frankie就完全唔介意，反認為可提供足夠時間裝備自己，否則都未必夠膽接今次的音樂劇。採訪：杜杜攝影：譚志光形象:PIPA Creative(Frankie) 髮型:Seiko Sin@HairCulture(Frankie)、Mavis [email protected]_hair(強尼) 化妝:Mayling Suen@Annie G. Chan Makeup Centre(Frankie)、Yuki Pan@yukimakeup(強尼) 服裝:I.T、Both(Frankie)

Frankie現在心態準備好，夠膽嘗試更多不同類型的工作。

兩人形容今次合作，好似去森林探險，一齊摸索互相照應，感覺好正。

繼去年音樂劇《二人餐》，強尼再演出音樂劇，他形容有了上次小試牛刀經驗，今次較安心，「舊年都係8月做，但個場細啲200鬆啲人，今年個場大好多（戲曲中心），做完細場再做大啲，個心又會好啲喎！」第一次演音樂劇的 Frankie坦認超緊張，「強尼舊年小試牛刀，我一嚟就大試牛刀，哈哈！」強尼笑他，「一嚟攞西瓜刀！」Frankie未見製作團隊時壓力超大，接觸後才稍為放鬆，「見到團隊圍讀過，我又跟小龍（女主角、出品人及編曲黃靖程）學過幾堂唱歌，個心先定返好多，跟住見到啲飛又賣得好快，係支好大嘅強心針，幫我去肯定自己，知道有人支持，有信心做。」

強尼去年跟吳海昕和釗鋒合演音樂劇《二人餐》。

Frankie和強尼還會跟黃靖程（左一）及馮志佑（右一）有對手戲。

強尼有機會玩唱跳

劇中會配合劇情演繹大量經典廣東歌，講明對唱歌冇自信的Frankie好雀躍：「跨幾個年代歌都有，我哋團歌都有呀！哈哈！但未必係一個人唱晒，應該會分工。」強尼即興奮扮男團：「大家好！我哋係MIRROR！」講男團講得興起，強尼再鬼馬問：「你係咪想睇我跳舞？哈哈！等我考慮吓，未知豬仔老師（編舞師）點安排，可能到時發覺我骨骼精奇，唔排場跳舞畀我都唔得，哈哈！」講到戲中的感情關係，兩個大男人變得吞吞吐吐，強尼：「呢個真係，唉！點樣去表達畀你哋聽呢？！」Frankie諗到唔劇透下點解釋，「我會同時愛上小龍同強尼個角色，但愛又未必等如男女朋友嗰種關係，正如fans都咁愛我，咁支持一樣。」

Frankie不介意演戲機會不及隊友，認為每個人條路也有不同。

舞蹈員出身的Frankie，對音樂劇演出有一定幫助。

2018年《全民造星》後，兩人才首次正式合作，Frankie覺得用拍檔視角望強尼，又有另一番風景，「第一次觀察到強尼做嘢嘅認真，同第一次聽佢唱歌，我睇強尼多咗好多星星，又多咗啲色彩，拍檔感覺強咗。」強尼直言主持《造星》後，令事業起飛，亦覺得Frankie成長了很多，「平時都係認識佢製成品嘅一面，但未試過一齊經歷工作過程，感覺係新鮮，同呢個人好似好熟識，但係第一次一齊做嘢，感受最深一齊圍讀同試歌，發覺佢呢5、6年不止畀我喺綜藝、演唱會見到咁簡單，嗰啲原來只係面嚟，呢幾年經過鍛鍊，個底仲有。」

強尼趕拍新劇《總有一瓣》和《反起線聯盟2》，還要為音樂劇準備，但他忙得好開心。

Frankie（前左一）跟老師學演戲。

佛系人生唔會妒忌

Frankie在ViuTV劇《IT狗》的「Never」和《野人教師》的「Marco」均獲讚，可惜無以為繼，不少人替他不值，他反而睇得好開，「每個人走唔同路線，一定會有人遲啲，有人早啲，我遲啲先開始，儲落嘅嘢會多咗，起步嗰吓唔使咁多摸索階段，我睇呢樣嘢係樂觀哋有利嘅。」粉絲戥Frankie肉緊，但一向佛系的他又有另一個睇法，「我好少會羡慕或者妒忌人哋有嘅機會，我覺得機會畀到我時，我做得好就OK。」

Frankie在《IT狗》演性格負面的「Never」獲讚賞。

Frankie跟隊友邱士縉在《野人教師》表現同樣得正評。

Frankie又攞今次音樂劇做例子，認為機會出現前，首先要裝備好自己，「如果早3年畀今次呢個機會我，我可以做到成督屎咁，乜都做唔到，應該直情handle唔到，咩standard都唔到，根本接唔到呢件事嚟做。」他認為裝備得最多，反而是心態上多於表演技巧上，「我以前會block咗自己一啲方向嘅走向，可能唱歌唔係好得，咁就唔唱歌啦！但係咁樣其實係封殺咗自己嘅路，點解唔試多啲唱歌先同大家講，我真係唔適合呢？！雖然我冇咁講過啦！我𠵱家好願意去試好多唔同嘅嘢。」