古天后日誌｜港股若未能迅速重回萬八關 隨時下試到這水平

8月23日，短暫時間月陽光，間中有幾陣驟雨，局部地區有雷暴。隔晚美股個別發展，美國10年期債息由16年高位回落，銀行股受壓，拖累道指跟標指分別跌174點及12點，納指則升8點。雖然美國通脹有回穩跡象，但媒引述一項最新調查發現，多數打工仔轉工薪金卻創歷史新高，接近年薪8萬美元之多（約62.4萬港元）；由於薪金為推動通脹嘅主要因素之一，意味住美國潛在通脹仍可能會一直處於高位。

目前美國通脹數據顯示通脹確有緩和，但遠未及聯儲局2%目標，鮑爺較早前亦繼續放鷹，薪金高企可能令聯儲局繼續維持高利率政策。聯儲局今年之內應該唔會減息，令市場開始擔心美股喺高位未能再靠減息期望而突破向上，反而會迎來一個較大幅度調整。

近日「大賣空」主角原型Michael Burry近期又有驚人舉動，根據美國證券管理委員會（SEC）公布嘅文件，Burry嘅投資公司「Scion資產管理」（Scion Asset Management）喺第二季買入價值8.66億美元嘅標普500指數ETF認沽權，以及7.39億美元納斯達克100指數ETF認沽權，明顯係睇淡後市。不過Burry係就係貼中2008年海嘯，但其後已有七次睇錯市紀錄，對於美股後市何去何從，市場意見都幾兩極。

古天后認為，港股雖然弱勢反彈，但未能扭轉大方向。

至於港股就不提也罷，雖然呢兩日喺17,600點水平似有支持唔多肯再落，但反彈力度認真麻麻，噚日大市反彈167點，係近日唯一一次收市價高過上一個交易日，可惜成交繼續低迷，缺乏成交配合，即係大市由20,000點水平回落逾二千點至18,000點水平樓下，仍未有資金肯趁低吸納，弱勢反彈只係呢個幾星期超賣得過份，不過弱勢反彈未能扭轉大方向，恒指若未能迅速回升至18,000點水平企穩，噚日回補17,900點即市下跌裂口後，再回落至17,800點水平，再度失守17,800點水平，大市亦只有再度考驗17,500點或下移至17,300點回補裂口。

相關文章：

穆迪下調10間美國中小型銀行評級 憂融資成本上升影響盈利

美國降級│惠譽解畫下調美國AAA信貸評級4大原因 反駁耶倫  「並非單憑數月經濟走向」

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ