獨家丨Lyman KC拍廣告冇底線：衛生巾都可以　玩《造星V》倒水式使錢亨仔最抵

2023-08-22 07:00

《全民造星V》冠軍香胤宅（Lyman）、亞軍黃家灝（KC）及季軍陳鎮亨（亨仔）得獎後，Fans都好緊張三人前途，跟ViuTV傾約中的他們反而唔急，食住個勢拍住廣告賺快錢先，暫時最受廣告客戶歡迎的Lyman，唔介意拍女性用品如衛生巾廣告，更即場度埋橋；而跟楊安妮（Win Win）拍拖5年的KC，笑言唔敢同女藝人工作時太Close，怕生命受威脅；至於亨仔，本報日前獨家報道其父母同女友點樣支持佢，幸福的亨仔。採訪：杜杜攝影：Stanley

KC、Lyman和亨仔大方公開有另一半，完全唔擔心影響圈中發展。

有小女孩錄音留言表示鍾意睇Lyman跳舞，佢好開心亦希望演出令到下一代都鍾意跳舞。

對於未來工作方向，Lyman和KC都堅持以舞行先，KC說：「公司都覺得可以試吓用跳舞呢個媒介，睇吓做到啲乜嘢。組團就最緊要風格match，有時個人有時一齊，又可以做啲promotion，用跳舞去做節目，好多跳舞人都有啲綜藝感，如Stick哥（《造星V》林昆樂）講嘢真係好好笑。」亨仔就傾向夾Band，「呢個階段未咁適合個人發展，仲同公司傾緊，睇吓佢哋制唔制。」

亨仔最深刻留言是「亨仔又喺度亂嗌呀！」他稱已吸納意見努力改善。

亨仔羨慕Lyman拍洗面廣告

因租場排舞所費不菲，加上添置道具，Lyman和KC坦認參賽以來至少花了4、5萬，好彩得獎後即接廣告補數，而亨仔就最抵玩，「冇乜使錢咁滯，ViuTV好好，每Round都有Budget，我哋玩音樂，可以返公司Book房，通利琴行都提供地方。」三人笑言乜廣告都拍，就算女性用品都冇問題，即衛生巾亦OK，Lyman和KC更大方透露有幫另一半購買經驗，Lyman仲度埋橋，「我有老婆！個廣告可以話family man都要幫老婆買。」KC補充：「雖然我伴侶有大把M巾，我諗緊我拍會點拍，哈哈！」KC最愛Pokémon，開到口想拍card game廣告，「我見台灣有，好想要，每個月寄畀我抽吓，過吓手癮都好。」亨仔喜好就最易估，「我想拍做gym運動衫、褲嗰啲。」KC就提議，「你賣能量飲料，飲完喺度嗌！」而Lyman就最Like配合其life style的廣告，亨仔即表示羡慕他拍潔面用品廣告，「我都好想試吓拍洗面嗰啲，哈哈！」

三子講起拍廣告好雀躍，就算拍衛生巾廣告都完全唔尷尬。

Lyman最滿意《B.A.D.》演出，最唔想睇返《Master Class》，「我哋亂砌啲嘢出嚟，係開心但唔想睇返。」

KC最鍾意自己的solo演出，最怕睇返《創作者的派對》，「走音好礙耳，好難聽呀！」

亨仔最深刻留言是「亨仔又喺度亂嗌呀！」他稱已吸納意見努力改善。

Win Win同KC互做樹窿減壓

KC女友Win Win在強尼主持的《Viu Chat》提到，入行後不堪壓力，做完節目返屋企會狂喊，KC表示當時扮演陪伴角色，聽對方傾訴，「最緊要幫佢食咗啲負能量，佢主要唔開心係少咗好多跳舞時間，又覺得自己做得好差，同佢講係學習，下次做得更好，同埋要學識控制好啲時間。」他承認當時有嚇親，原來入行咁大壓力，但冇因此放棄參賽，「困難同驚係必然要面對嘅嘢。」到他參賽，就同Win Win調轉樹窿角色，雖然私底下冇鏡頭前喊咁多，但一樣有好多不安，「好似變咗一條冇主見嘅鹹魚，好需要一個人去話畀我聽係啱，對自己太冇信心。」

KC最開心有小朋友在街上大叫他「藍毛毛」，上月收到留言祝他「happy new year」就最離奇。

KC不擔心因工作要跟女藝人親密接觸令Win Win呷醋，反而是自己怕醜。

KC自爆曾呷193同Jeremy醋

跟Win Win情侶關係深入民心，講到日後要跟女藝人合作仲要有親密舉動，KC就笑言：「個包袱唔係人哋接唔接受到，而係我做咗，生命會受到威脅。」他唔擔心Win Win會嬲，「會有少少耍花槍嗰種，『同其他女仔得啦』，但係唔會真嬲，反而我對女仔會好怯，會變鵪鶉。」Lyman好肯定唔擔心太太Zoe呷醋，因已經歷過，「開始拍拖時傾過，我跳拉丁舞比賽，又要拖手、hold住個partner，最初佢有啲唔開心，但隻舞係咁跳，𠵱家佢都係一個artist會明白，佢要做戲同對手錫、攬，就要professional，我入咗個戲，又要諗我老婆O唔OK，同對手好難投入。」KC就自爆曾呷193醋，「Win Win拍《困獸鬥》同肥仔一對，有時講笑話鍾意193、Jeremy，我都會（即場翻白眼），但係唔知點解又會trust佢，覺得係冇問題。」