獨家丨林子博趕住移民冇睇住老婆入土為安英國返港即跪拜亡妻求原諒

2023-07-20 07:00

喪妻近3年的無綫娛樂台前主播林子博，於老婆Shirley離世後10個月帶同一對仔女離開傷心地，移民英國重過新生活。子博一家最近返港度假，上周更被讀者在柴灣華人永遠墳場野生捕獲，帶住子女拜祭亡妻，據讀者形容，全身黑的子博一臉憂傷，登車後再一個人折返，眼濕濕地輕撫骨灰龕位上太太的相片，《頭條日報》記者致電子博，他稱日前返港：「返港第一件事係要向太太負荊請罪，求佢原諒我。」採訪：方騫平

林子博上周帶同子女跪拜亡妻，逗留半小時。

去年10月21日Shirley離世兩周年，子博上載深情文章，除大讚老婆好靚，更提醒大家要珍惜身邊人。

上月王晶反擊李婉華批評佢製作的劇集《一舞傾城》教壞細路，連帶齊做網台節目《豪華博客》的拍檔林子博都中「槍」，慘變晶哥口中的「十八線奀星」！雖然子博唔算紅，但又未至於十八線。上周二(11日)中午就有讀者B小姐於柴灣華人永遠墳場遇到佢，全身黑的子博帶住仔女，由一名男親友陪同下到靈灰龕位拜祭亡妻，讀者表示子博同親戚擺好個「壇」後率先跪拜，再引領吹住風扇係咁話熱的子女跪拜媽咪，期間子博叫仔女跪地奠酒及向媽咪交代近況。大概逗留半小時，執拾好物品後，兩子女緊隨爸爸拎住香燭、衣包去化寶爐燒祭品，讀者以為子博化完寶便離開，「子女上晒車後，子博突然一個人折返，獨自喺亡妻嘅靈灰龕位前低頭肅立咗幾分鐘，再好感觸咁摸住靈灰位中上太太嘅相，然後依依不捨離開，我睇見都有啲心酸。」

YouTube頻道《子博在英國》，子博每周一晚跟李婉華及杜挺豪一齊主持《李咪博咀》節目。

2020年11月14日子博和子女送別亡妻。

大女詠渝及孺仔卓楠幫手化寶。

子博撇下子女折返，站在亡妻嘅靈灰龕位前低頭肅立咗幾分鐘。

未習慣移英生活
致電子博了解，剛回港的他坦言離港兩年，返港翌日即帶同子女去拜祭已故父親、外母及妻子，對於首次拜亡妻，子博相當自責，「見到佢個靈灰位覺得好慚愧，要去贖罪，因為當日太太未入土為安，我經已唔喺香港，太太上位事只能交由大舅處理，呢個係我最解唔開嘅心結，兩年嚟個心一直唔舒服。」子博解釋因timing問題，除咗未知幾時排到靈灰位，香港屋企的租約又期滿，加上要配合卓楠(孺仔)在英國的開學時間，「做人要向前望，𠵱家我嘅世界只得兩個人(子女)，乜到以佢哋為先，坦白講唔係旅行係移民，過去兩年仲未好習慣當地生活，但我唔捨得掉低佢哋喺英國讀書，佢哋經已冇咗媽媽，唔可以冇埋老竇，只能辛苦啲去適應，所以佢哋大學畢業前，我仲未向太太交代得到，唯一安慰係太太同佢媽媽『住』得好近，可以互相照應。」子博對子女相當著緊，將是是非非睇得好開，「話我係『十八線奀星』我冇嘢喎，呢幾年我由冇咗份工到老婆走咗，兩年嚟湊住兩個小朋友去到一個人生路不熟嘅地方，英文又唔好…我有咩未經歷過呀？」

移居英國曼城兩年，一家三口過住平淡生活。

之前RubberBand到英國開騷，子博陪子女去捧場時影大合照，圖中有黎萬宏（泥鯭）及「跟得女友」黃心穎。

子博剛剛過咗52歲生日。

今年復活節子博帶囡囡去咗紐卡素度假。

留家煮飯仔價錢平過香港。

做YouTuber搵得少
目前子博主力經營自家YouTube頻道《子博在英國》，收入僅夠交水電煤：「希望再做好啲，多啲人睇變成一個正職啦。」他不忘為自己賣吓廣告：「其實《子博在英國》包括講星座、堪輿學、兩性關係、仲有性治療師一齊傾偈、及跟婉華合作主持嘅《李咪博咀》及《豪華博客》。」子博強調英國使費唔大，只係能源費貴，買餸煮飯平過香港，所以唔難生活，即使𠵱家租住曼城郊區5房、有車房及超大型花園配套的半獨立屋只需萬多港元租金，並非所指的愈住愈豪。