星8卦｜「三寸」爆紅忘本得罪人多親自搵人拉關係被粗口問候

2023-07-07 11:00

做人真係唔好太盡，因為你無法保證自己掂足四季。

最佳人辦就莫過於「三寸」初時喺上面撈得好掂，就當出生地上上下下流嘅，畀晒面色，反晒白眼，一副我以後唔使靠你哋。點知死性不改，喺上面撈得好掂時一樣成日做碼頭咕喱，得罪咗最大嘅電視台，一聲令下封殺，大台有此舉動，其他跟尾嘅自然有樣學樣，起碼唔會搞錯風向。

上面無位企，「三寸」死死地氣返嚟搵食，為咗開演唱會攞靚期，一改之前大鼻唔識人嘅作風，周圍約人食飯，搞笑在佢無助手，乜都親力親為，有次打電話畀一個之前都相熟嘅DJ，對方聽到佢話自己係「三寸」，以為俾人整蠱，足足用咗15分鐘鬧佢神經病，當然唔少得粗口問候，DJ梗係唔好意思，但又點估到你三、五、七年唔搵人，竟然會自己打嚟拉關係啫！

為咗要人記得自己，「三寸」cheap到自己掏腰包買天王嘅演唱會飛，好高調咁俾人見到，拍埋片扮小粉絲，但聽講佢以前都唔係好睇得起人，今日咁樣抽人水，又真係好唔要面。至於係咪可以收復呢邊呢個失地，就祝佢好運嘞！