頭條戲場丨《怪物》做人父母請入場

人人都有自己的道德標準，亦喜歡將自己把尺放在別人身上，加上社會灌輸大量所謂正確的價值觀，符合標準就獲高度讚好，唔符合就當你怪物。單親媽媽早織（安藤櫻飾）發現兒子湊（黑川想矢飾）有異，原來遭老師保利（永山瑛太飾）欺凌，翌日向校長（田中裕子飾）投訴，換來記錄在案。你覺得老師好衰?火滾校長點解唔處理?心痛小朋友?世界不是非黑即白，導演利用三線分拍視角，同一時空下從不同角度，帶住觀眾將細節整合，抽絲剝繭地呈現真相，冇一個人是無辜的，你同妳都係怪物。(上映中) 撰文:廖思慧

星川依里(左、柊木陽太飾)及麥野湊(黑川想矢飾)帶起成套戲，兩人都有可憐之處，究竟導演點搵到做戲咁叻嘅童星?

麥野湊，勇敢的小五生。

星川依里，得意到好似小精靈咁，眼仔水汪汪。

因為囝囝被虐遭輕視處理，單親媽媽決定搞大佢，獲傳媒高度關注。輿論壓力導致學校不再平靜，家長及學生們對老師指指點點，最後工又冇女友又走埋，好想講句你都有今日?導演的設局成功了。

從老師篇可見保利同學生關係好好，點解阿湊要屈佢?

老師保利(右)被投訴，學校唔想聲譽受損，勸強調自己冇欺凌的保利好好道歉。

保利女友好勢利，知道男友被炒即走人。

人人都係怪物
編劇坂元裕二的劇本好厲害，對白入肉零廢話，難怪拎到第76屆康城影展主競賽單元最佳劇本獎。故事唔複雜，分為阿媽篇、老師篇同小朋友篇，前兩篇刻意設局，舖排懸念，觀眾以為電影主線講學校欺凌，第三篇玩開估，眼淚已經忍唔住。

安藤櫻飾演的單親媽媽，對囝囝唔算嚴格，但經常開口想個仔未來要點點點，有冇問過個仔呀?

中村獅童飾演依里爸爸，用一個非常唔正確的方法教仔，我又指指點點了。

觀眾睇老師篇一定會話校長係一個衰人，個個都鍾意做判官，指點其他人啱定錯，田中裕子做得超好。

戲中最重要的場景，即兩個小朋友的秘密基地，不過舊火車在拍攝後已移走。

地址位於長野縣諏訪郡富士見町的舊立場川橋和舊瀬沢隧道，以後去日本多個景點去嘞。

暴風雨後見陽光，成身泥的兩位童星笑住奔跑，結果係Sad定Happy，自己諗啦。

因為唔想劇透，可以講嘅已盡講，電影最特別之處是觀後感人人唔同，反思位亦相當多，過度追求社會公認嘅標準，又或用標準將人標籤為「怪物」嘅人其實最怪物，要討論真係有排講。總之故事出色，分鏡完美，攝影配樂冇可挑剔，童星演技點解可以咁勁? 好好睇呀。

《星島頭條》新網站有更多精彩內容：http://www.stheadline.com/