星8卦丨「唱得」堅持用「畜牲」做幕後隨時累全家要停工

2023-06-16 11:20

「唱得」又再開show，因為餓咗幾年，大家報復式搶飛，唔駛講一開就爆晒，呢排「唱得」唔敢接電話，因為爭人一身飛債。其實佢仲有一樣嘢煩，就係佢搵咗嗰位幕後製作人，就係近期人人聞風喪膽嘅「畜牲」。

「畜牲」喺呢行好多年，但一直都唔係好夠斤両，全部都係求求其搞掂，終於早排出咗大事，害咗一個大好青年，斷送人哋嘅一生，佢又好似無乜嘢咁。其實「畜牲」無料歸無料，但勝在有人緣，或者擦鞋功夫勁啩。好似「神經」啲show係人都想做，易出名又好數期，啱啱出事無耐，「神經」都諗住繼續搵佢揸𨋢，但反對嘅聲音係100%，「神經」無奈唯有放棄。

「畜牲」咁得人心係因為佢超級機會主義者，最叻係擦啲歌星鞋，而且高明得很同人人交心，又氹到啲經理人好開心，送唔少着數，但對下面嘅工作人員就呼呼喝喝，非常無禮貌，總之就係見高拜見低踩。「唱得」份人好有性格，認定係嗰個都好難叫佢改變主意，依家主辦方唯有話萬一「畜牲」要上身惹官司，隨時累到佢個show開唔到，希望可以令「唱得」清醒些少，唔好再擺埋嗰種大愛feel，俾機會人哋翻身，其實係累全家。