星8卦丨「巴閉」出事後低調來港生活怕被人認到唔出街免麻煩

2023-05-30 10:00

「巴閉」真係行運嘅，細細個紅透半邊天，一直都走食腦路線，做埋幕後人搞乜都大收，搵到一啲錢就學人去投資。當時跟到在上位嘅「鬼才」，簡直係人生勝利組嘅姿態打橫行，佢又真係有風盡駛𢃇得濟，當年得罪唔少人。

隨住「鬼才」講嘢口沒遮欄搞到要着草出國，「巴閉」自然一齊行衰運，最現實係「鬼才」覺得巴閉陀衰家，叫佢早啲彈開。人人對「巴閉」行踪多多揣測，以為佢被扣留或者逃亡，但其實佢邊度都無去，一直靜悄俏咁喺香港生活，因為小朋友係呢度讀書，而佢又有啲控制狂，兩個小朋友起居飲食跟到足，連返學放學都跟埋司機一齊，珍惜路上相處時間。

每次出去「巴閉」都如臨大敵，將自己包到密一密，有時直情用易容術，戴假髮着到爛身爛勢咁出街。可惜香港人真係好眼利，成日係街市搵到佢買餸，每次一畀人認到，就好似見鬼咁秒速逃離現場，有次直情連餸都唔拎就走咗，從此開始網上買餸，街都唔駛出。

出事之前「巴閉」一直住上海，出事後幾經辛苦嚟香港都係想平平靜靜，依家除咗係細路需要至見人，其餘時間好似消失於地球咁，虧佢忍得呢種悶爆生活。