星8卦丨「甜甜」繼承高官身家嫁司機無委屈幾世無憂

2023-06-13 10:00

自從貪心事件爆咗出嚟之後，「大富」即刻同「甜甜」劃清界線。原因係諸九族，「大富」自己都危危乎，「甜甜」自己諗掂以後話之佢啦！

「甜甜」憑一套劇紅足幾十年，又真係奇蹟，後嚟點樣做埋商界女強人，就更加奇上奇。當年佢紅咗就跟咗一位高官，有財有勢，所以後期成日打橫行女霸王咁係有人撐腰，圈中唔少人都受過佢啲氣架。

後嚟點解佢會突然結婚，當中梗係有段古。話說嗰位高官唔知點解得罪高層，仕途無晒不特止，仲要預計係連命都無，於是即刻將成副身家過晒俾跟咗自己20幾年嘅司機，其實之前好多唔見得光嘅錢都交俾司機處理，對方勝在忠直敦厚，然後吩咐甜甜同佢結婚，最好生一兒半女，啲錢就可以一代傳一代，用心可謂良苦。

所以「甜甜」突然爆出個外籍老公，然後好有錢咁但問起全世界都唔知佢係邊位，「甜甜」就泊咗埋大富身邊，拎咗一大筆錢做投資，然後就塑造自己成為新一代商界女強人，「大富」見你有名氣仲有錢幫自己創業，梗係無任歡迎，但大難臨頭就梗係一腳伸你落山。「甜甜」依家啲錢都係幾世都駛唔完，不過無咗面子龜縮唔見人就淒涼啲。