路見不平｜盧覓雪睇唔過眼泥鯭被千萬鏡粉圍攻︰人多就聲大聲大就夠惡？

2023-05-11 18:32

RubberBand成員泥鯭日前就姜濤在《CHILL CLUB推介榜年度推介22/23》領「年度男歌手獎」銀獎時，在台上向11位隊友發表肺腑之言連環出post嘲笑，惹來千萬鏡粉到其社交平台展開洗版式罵戰，血流成河。RubberBand昨晚終發聲明，向各受牽連單位及人士致歉。今早（11日）盧覓雪在電台開咪替RubberBand被圍攻感不值，更謂每個人都有言論自由，實在睇唔過眼。

雪雪認為每個人都有佢嘅言論自由。

盧覓雪在其商台節目《在晴朗的一天出發》中表示︰「我見到另一團人去道歉，做乜嘢呀，個世界係咪一定要咁樣㗎？點解呀？批評唔可以接受嘅﹗我最鍾意批評人，日日都有批評人，咁即係點呀，日日都要道歉呀？要話以下不代表商台立場，係咪啊？黐線﹗我睇到火都嚟﹗我學嗰啲人囉，我學啲惡形惡相、網上欺凌嗰啲呀。其實我唔係佢哋歌迷，不過我都睇唔過眼，真係要出聲囉﹗都係咁樣認為囉，係咪呀，批評一個人，每個人都有佢嘅言論自由﹗」

今早（11日）盧覓雪在電台開咪替RubberBand被圍攻感不值。

她續指︰「有啲道歉係『我怕咗你囉，我同你道歉囉』，即係息事寧人，費事煩落去，有手尾跟。」並強調自己只是旁觀者，但實在看不過眼︰「其實有啲嘢與我無關，一個人批評一個人，我純粹係側邊見到佢批評佢，但係因為你批評一個人而遭受到一村人、一群人圍攻。『你做乜批評佢呀？』咁我覺得呢個現象不可取﹗人多就聲大，聲大就夠惡，係咪呀？個時代變遷咗，我明白，但係我哋呢啲老派人，睇嘢有自己嘅一套標準。我年紀大，愈見到呢啲嘢愈刺眼，愈唔舒服，覺得點解要咁樣呢？我真係唔化㗎，化咗我可以肯定唔會再坐喺度﹗」

節目一出，《晴朗》fb再成新戰場，大批網民認為泥鯭「可以批評但不要用粗口人身攻擊」、並表示：「批評與人身攻擊」是兩回事。