星8卦丨「花仔」玩到「初心」盡幸得「叔叔」不計較重拾幸福人生

2023-04-11 10:00

「初心」份人一直好單純，咁多年對「花仔」念念不忘，無非因為呢個男人係自己初戀。正所謂情人眼裏出西施，大家都勸「初心」睇下呢個世界仲有其他男人，「花仔」不單年紀大，仲有老婆，而「初心」只係其中一個傻瓜，盲目崇拜佢。

「初心」最習慣係畀「花仔」擺埋一邊，有需要就去搵佢發洩下開心下，以「初心」讀書又叻，性格溫和，絕對唔駛咁蹧蹋自己，雖然好多朋友介紹男仔佢識，但佢就死心眼覺得無問題。好彩終於等到「叔叔」嘅出現，「初心」一向缺乏父愛，對後生仔無興趣，「叔叔」見識多又夠江湖，「初心」呢個時候又畀「花仔」搞到周身病，仲要賤到認係自己唔檢點，都叫咗「初心」放自己生路，唔好再糾纏。

「初心」已經習慣佢啲賤嘢，回頭見到「叔叔」話唔介意自己嘅過去，覺得人生仲有啲希望，而且對方好識錫自己，感覺舒服已唔關乎愛唔愛，半年後仲即刻成家立室，婚後甜蜜蜜，當「初心」如珠如寶。「花仔」礙於「叔叔」嘅人面，初時都有諗過攪攪震，搵人講好多「初心」對自己幾唔放手嘅癡纏，希望激發「叔叔」妒忌心而離棄「初心」。點知「叔叔」乜都講晒畀老婆知，話就係欣賞佢咁專一痴情，希望餘生佢都可以咁對自己喎！