專欄｜車仔精兵加盟 樸達再無藉口
2023-02-19 09:00 
大家好！繼卡塔爾世界盃後，艾爾再次「踩過界」，喺《星島體育》同各位讀者大談波經，未來仲有機會上《猜波台》嘅直播節目，同觀眾互動同提供投注心水，真係諗起都興奮呀！
艾爾係車路士球迷，睇住愛隊今季踢得唔好，當然唔開心。樸達係要負責任，尤其喺凝聚力方面做得不足。不過，艾爾覺得車路士季初成績唔好，某程度上因為球隊傷兵太多，中場創造力弱過「藥煲」，前綫把握力繼續唔好，陣容本身已經問題百出。淨係季初嚟講，呢隻鑊絕對唔能夠由樸達一個人孭晒。
去到季中，米基路梅迪歷、安素費南迪斯同祖奧菲歷斯強勢加盟，車路士開始有啲嘢睇，奈何夏維斯同美臣蒙特踢到懷疑人生咁款，古古列拿明顯貨不對辦，都拖累球隊表現。艾爾覺得樸達𠵱家揸住嘅呢副牌已經好咗啲，隨住傷兵逐步復出，期望值相應都要提高番啲，可以畀樸達嘅藉口真係唔多，否則恐怕只會步莫耶斯敗走奧脫福嘅後塵。
投注心水方面，韋斯咸近期喺防守上有所改善，即使過去作客熱刺成績一般，但主隊周中博完歐聯，體力上較為輸蝕，呢場要讓球「+0.5/1」客勝。艾爾
立即下載 | 全新《星島頭條》APP : https://bit.ly/3yLrgYZ
關鍵字
最新回應