专栏｜车仔精兵加盟 朴达再无藉口
2023-02-19 09:00 
大家好！继卡塔尔世界杯后，艾尔再次「踩过界」，喺《星岛体育》同各位读者大谈波经，未来仲有机会上《猜波台》嘅直播节目，同观众互动同提供投注心水，真系谂起都兴奋呀！
艾尔系车路士球迷，睇住爱队今季踢得唔好，当然唔开心。朴达系要负责任，尤其喺凝聚力方面做得不足。不过，艾尔觉得车路士季初成绩唔好，某程度上因为球队伤兵太多，中场创造力弱过「药煲」，前綫把握力继续唔好，阵容本身已经问题百出。净系季初嚟讲，呢只镬绝对唔能够由朴达一个人孭晒。
去到季中，米基路梅迪历、安素费南迪斯同祖奥菲历斯强势加盟，车路士开始有啲嘢睇，奈何夏维斯同美臣蒙特踢到怀疑人生咁款，古古列拿明显货不对办，都拖累球队表现。艾尔觉得朴达𠵱家揸住嘅呢副牌已经好咗啲，随住伤兵逐步复出，期望值相应都要提高番啲，可以畀朴达嘅藉口真系唔多，否则恐怕只会步莫耶斯败走奥脱福嘅后尘。
投注心水方面，韦斯咸近期喺防守上有所改善，即使过去作客热刺成绩一般，但主队周中博完欧联，体力上较为输蚀，呢场要让球「+0.5/1」客胜。艾尔
立即下载 | 全新《星岛头条》APP : https://bit.ly/3yLrgYZ
關鍵字
最新回应