頭條戲場丨《1人婚禮》陳健朗真心正囉

討論區有大量狠插此片的留言，又話爛片又話垃圾，爛片點都唔輪到佢，排吓隊先啦。我屬於第一批睇的觀眾，抱住睇「愛情喜劇」入場，嗱，當時宣傳係咁講㗎，原來一場誤會，一早話係輕鬆溫情小品咪好囉。散場後最有印象女主角阿冰啲靚衫，同埋白淨又Cute的陳健朗，如此繽紛活潑的陳健朗真係好少見，根本就係2023年版的「百厭死仔」，推介睇埋製作特輯「陳健朗：被鬍鬚耽誤的喜劇演員？」睇傻仔笑睇到會心微笑。(上映中)撰文:廖思慧

電影如阿冰Fashion Show。

唐浩然 飾演子浚，瘋狂基督徒，亦係阿冰隻兵。

套戲美術做得唔錯。

呢套黑白吊帶毛毛裙好得意呀。

阿冰最大志願係成為網絡世界大紅人。

情侶YouTuber阿冰及男友Dickson。

製作特輯「陳健朗：被鬍鬚耽誤的喜劇演員？」片段，咁CUTE嘅陳健朗你見過未?真心黐線。

可一不可再。

牙朗呢啲笑容平時點會見到。

回歸現實​，有冇人同我一樣覺得佢好有型?有?冇?咁算啦。

 

情侶扮分手呃訂閱
究竟呢套票房麻麻，場次不斷被Cut的電影講乜?主角阿冰(吳冰飾)和男友Dickson (陳健朗飾)是YouTuber，因為自家頻道谷極唔起，呢對同居情侶為求提高點擊率扮分手，然後女方再自導自演「一人婚禮」，因為夠爆夠勇夠正能量，點擊超勁，阿冰更成為「愛自己」KOL，吸引大堆Fans力撐，包括有強逼症的花店老闆娘樂儀(盧巧音飾)，最後，阿冰突然覺悟呃人是不對的，然後勇於接受真正的自己。

 

「一人婚禮」原意是在眾人的見證下，真誠地表現對自己的完全接納和愛。

呢幕係全片最好笑。

兩人都係YouTuber夢想成為熱爆YouTuber。

Dickson 有小聰明，自私，咸濕，以冷嘲熱諷無聊事為樂，自大，不可一世，典型古惑仔氣質，開口說話時又不失風趣幽默，新聞稿咁寫。

阿冰喺戲中都有性感演出。

兩人順應網民要求玩求婚，實際是假結婚，慘遭悔婚的阿冰決定要同自己結婚！

阿冰一啲都唔差喎

睇返周冠威導演的訪問，原來曾經考慮tagline用「YouTube世代的魔幻童話」，因為童話世界的黑白分明，可以呼應現實網絡世界的愛恨分明，其實用呢句好好多。主題幾有創意，故事亦好完整，每位演員都好努力，最重要反映現實，游走網絡世界唔使咁認真，搞掂自己先，坦誠面對真正的自己，好好愛自己先可以愛人。有人彈阿冰做得差，其實佢好可愛仲有啲似初出道嘅阿Sa，作為第一次絕對合格。不過導演有啲貪心，片長1小時55分，其實係咪真係要咁長?

翻查資料，上年套《闔家辣》都收3270萬港元，呢套點會差得過佢，票房得318萬港元?吓?

王宗堯同盧巧音飾演花店夫婦，一對大愛COUPLE。

盧巧音飾演的樂儀從阿冰身上得到極大心靈力量，更變成阿冰的頭號粉絲。

冇晒頸嘅紋身，應該遮得好辛苦。

陳逸寧飾演阿冰媽媽，角色幾乞人憎，但要讚佢KEEP得幾好。

 

《星島頭條》APP經已推出最新版本，請立即更新，瀏覽更精彩內容：http://www.stheadline.com/