劉偉強拍《無間道》集齊四位影帝大呻麻煩 杜汶澤狂NG開拍首日就想炒
2022-12-11 18:30 
電影《無間道》今年迎來20周年，最近推出三部曲的4K修復版，再登大銀幕，電影將於明日（12日）上映，最近導演劉偉強、麥兆輝一同上谷德昭主持的ViuTV節目《爆谷一周》大談當年拍攝軼事。構思劇本的麥兆輝透露《無間道》啟發自吳宇森的荷里活電影《奪面雙雄》（Face/Off）：「我覺得好好睇，但唯一令我唔相信有一個手術可以令兩個人換臉。於是我由嗰刻開始諗，有冇一個戲劇嘅方法令兩人交換身份。」後來創作出《無間道》的劇本，不過劉偉強一睇就表示「唔得」，因為最初的電影暫名叫「殺警」。
相關閱讀：57歲劉嘉玲著超低胸貼身衫慶生 網民讚嘆完美身段逆齡生長：fit到好誇張
【點擊睇劉偉強麥兆輝講《無間道》】：
當時無間道集齊香港四大影帝劉德華、梁朝偉、黃秋生及曾志偉，麥兆輝笑說：「最初係諗住我拍，佢（劉偉強）監製，但如果佢監製我拍，我得到嘅演員可能係陳冠希加李燦森。佢中間提出我哋聯合導演，搵大啲卡士，我即刻𦧲飯應。」劉偉強透露當初最先找劉德華，更獲對方一口答應，麥兆輝表示：「佢一開始睇完劇本已經知係雙雄片，後來知道我哋搵咗梁朝偉，華仔好公道，佢話畀偉仔揀先。」
劉偉強續說：「佢哋兩個都唔揀，我哋用最簡單嘅方法，劉建明畀劉德華做，偉仔做另一個角色。佢哋都聰明，無論邊個做都有出色表現。跟住4個主角，我同佢（麥兆輝）講，『反正都係搵晒影帝啦』，跟住我哋見咗好多影帝，秋生、志偉，咁就湊夠4個。」劉偉強還笑說4位影帝都好麻煩：「我記得有次約齊4個上嚟，我哋有圍讀，嗰陣啲戲邊有戲會有完整劇本圍讀，大家上嚟揭下劇本，跟住問『你點做啊？』，秋生話：『我點做關你咩事』。其實個氣氛係好嘅；我仲記得秋生話要將個劇本擺喺書枱上面，劇本寫得好，大家就想搞好佢。」
谷德昭提到戲中「傻強」杜汶澤經典對白「當一個人好專心去做一樣嘢，但佢又望住你，佢就係警察」，令他印象深刻。麥兆輝透露曾修改過很多遍，這句說話也是百份百原創作：「我成日覺得一部好嘅商業片，係有啲嘢大家開心、笑，各樣嘢都要有。」谷德昭讚杜汶澤演得好，但劉偉強就大爆曾想努炒對方：「我拍完第一下想唔用佢，嗰個鏡頭我好辛苦坐喺滑軌上，偉仔入去時追住佢拍，杜汶澤只係做一個好簡單嘅表情，偉仔入鏡。NG咗十幾次，跟住我擰轉頭望住麥兆輝。」麥兆輝笑說：「因為我話要用杜汶澤。」
節目中亦展示當日拍戲時的「連戲相簿」，裏面有當日多張珍貴劇照，上面寫上「無間行者」，麥兆輝解釋說：「喺「殺警」之後，working title改咗『無間行者』，但係同日本漫畫撞名，我自細屋企信佛，已經知無間嘅意思，覺得呢個名好啱呢套戲。」至於後來改名《無間道》原來也有段故，麥兆輝透露當時林建岳公司開戲有個傳統希望白龍王師傅改戲名，你要畀啲戲名佢揀，跟住提供幾個好雞嘅名。」劉偉強笑說：「我去泰國見師傅，師傅唔識中文，我讀畀佢聽，到《無間道》就大聲啲，咁佢就揀嗰個。」
【其他閱讀】：
陳凱琳鄭嘉穎被批唔識教仔！ 3歲大仔一舉動遭網民鬧爆勁冇禮貌欠尊重
張振朗與前ViuTV小花拍拖低調外遊避晒合照 女友楊偲泳露纖腰美背浸溫泉
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應