獨家丨陳嘉寶以身示範阿媽都可以有事業　首開咪主持商台《一家大晒》

陳嘉寶（Anjaylia）首度踏足廣播界，加入葉宇澄（Eugene）及黎榮業（Tristan）主持的商台節目《一家大晒》做DJ，獲兩位「師兄」讚她有潛質，三人仲好快融合到，而身為三女之母的 Anjaylia開咪就得到老公大力支持，她更希望自己成為囡囡榜樣，證明人母一樣可開拓事業。採訪：杜杜 攝影：Stanley髮型:Joshua Smiley@Lane Crawford、Claudie Pierlot 服裝:Jamie Lee @ Hair (Festival Walk)

 

Anjaylia由模特兒做起，電影電視都拍過，但廣播界以往未有機會接觸。

Anjaylia跟Eugene（中）和Tristan合作個幾月，大家講嘢已經好有默契。

今次Anjaylia有開咪機會，全因老友Eugene看到她的潛質，「我哋唔算係深交，同Anjaylia幾次傾偈過程中，已經覺得呢個人幾有趣，談吐好溫文爾雅，亦都講得好清晰，當我哋節目需要個咁嘅人嘅時候，我就好快醒起佢，加上我哋節目《一家大晒》個構造裏面，都好需要一個好有型，好有自己生活態度嘅媽媽角色。」 Tristan都讚她有潛質，「佢係有紋有路，起承轉合係好好，大家會有共鳴，搞氣氛佢都做得到。」

Eugene（左）和Tristan都讚Anjaylia表現出色，相信未來日子會做愈好。

Anjaylia希望在節目做人物專訪，一班圈中好姊妹當然是首選。

老公隔空玩遊戲支持

原來Anjaylia起初都有猶豫，雖然當年在樹仁新聞系畢業，但DJ這方面完全是新丁，「我係有讀過，但我係冇揀呢邊嘅路，我係揀寫嘢，同埋可能我讀新聞系又係文科，成日好多人覺得我講嘢有個好大嘅框係衝唔破，我講嘢好小心，好有紋路，我諗嘢要寫得出嚟，會用書面語嚟諗，用嘅字同詞語啲人會覺得好悶，我覺得要踏出呢一步，突破呢個框框，於是就嚟試吓啦！」

2017年，Anjaylia下嫁初戀男友黃頌祈，正式做人妻。

老公一直很支持Anjaylia工作，仲會聽節目力撐。

雖然已是人妻兼人母，但Anjaylia完全沒想過做全職家庭主婦，去年更簽約新經理人公司，就是希望事業方面再衝刺，而老公黃頌祈亦好支持她工作，所以這次有機會開咪，老公更會以實際行動撐老婆，「佢好歡迎我唔喺屋企，因為我去做嘢佢會戥我開心，佢仲會一齊聽，好似我哋節目有part叫《全家株式會社》，一個主持負責問啲冷知識，另外兩個主持比賽答，我先生就算喺架車度返緊工，或者接送啲小朋友，都會同步喺度玩。」

Anjaylia要開工，老公湊女完全應付自如。

Anjaylia話囡囡完全唔黐身，所以她去工作完全冇壓力。

收工享受元首級招待

至於三個囡囡見到Anjaylia去做嘢，一樣唔會詐型，「我平時喺度佢哋好黐我，但如果我出門口佢哋問我去邊，我話去working佢哋又會同我講bye bye，佢哋真係好乖，我每日返到去都會享受到貴賓式嘅歡迎，我最enjoy去完 staycation或者做完好耐嘢返屋企，我同我先生就會開定個電話嚟錄影，錄低開口嘅一刻，覺得自己有元首級嘅招待。」

Anjaylia的長女Hosanna在2019年1月出世，翌年9月到次女Eliana。

今年1月，Anjaylia第三次做媽咪，誕下孻女Azaliah。

Anjaylia堅持繼續工作，除了自己想追夢外，原來亦想為三個囡囡做好榜樣，「我成日都希望做到人辦畀大家睇，女仔唔係淨係得家庭，點解女仔生咗一定係搞啲小朋友，之前讀咁多書同埋建立嘅事業，點解會覺得可以一下就冇咗呢？個夢想點解一定係女仔放低晒呢？男仔就唔使呢？我有三個小朋友，我由細到大悉心栽培佢哋，我想做一個人辦畀好多女士同埋我啲小朋友睇係可以做到。」

Anjaylia由結婚開始，早已沒想過做全職家庭主婦。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ