Juicy叮｜桌面無執紙杯遭收$200清潔費 Party Room客人批店方「呃錢」

不少人喜歡與朋友到Party Room聚會，但租房費用不時會惹起客店之間爭拗。有網民近日在網上發文，分享日前光顧Party Room的不愉快經歷，不但列出該Party Room的多個毛病，更指店方事後以他們未有清潔好場地為由，收取250元清潔費。網民甚為不滿，直斥「呃錢」。

該網民早前向facebook群組「西店Hi客之道」投稿，分享日前光顧Party Room的經歷。樓主指，預訂房間時需支付1000元按金，若在退房後沒有問題則在兩日內退款。樓主一行7人在租房當日支付1715元租用一間細房。職員在開始前有說明守則，例如「儘量唔好整太污糟就可以」、「如果有損壞，我哋會喺淘寶買返再照單收錢」、「飲品任飲，喺雪櫃自己攞」等，樓主稱「當我哋開始玩嘅時候，發現咗呢間party Room真係好唔掂」。

樓主指，當開始玩時，「發現咗呢間party Room真係好唔掂」。「西店Hi客之道」FB

樓主逐一道出房間最少有七大問題，他們7個人加上旁邊的大房，雪櫃卻只有18包紙包飲品，飲品數量不足夠；房內的每一副啤牌都不齊全，「要我哋自己攞兩副差唔多色嘅，再數返一副啤牌岀嚟玩」。樓主續指，房間的隔音不理想，兩間房只是一板之隔，「唱K係兩邊鬥大聲」，唱K系統及投影機又會突然故障。「部電視係有幾條痕係中間」；樓主稱因電視畫面故障，他們未有在房內玩電子遊戲機；房內的電動麻雀枱洗牌時間長，「我哋打完一鋪都未洗完，咁我哋就手洗等佢。點知我哋打咗三鋪都未洗完」。

樓主形容只想有個場所可供他們聚會，但其後他們在兩日後仍未收到有關退回按金的信息。詢問該Party Room店後，獲告知由於他們未有清潔妥善房間，亦未有將物品放回原位，影響了下一批用家的時間，因此需收取250元清潔費。樓主不忿地表示，「之後就隨便影咗兩張相畀我哋睇，喺我哋玩完嘅枱面，上面有幾個紙杯，兩盒桌遊。無啦！」樓主直斥「原來開party room咁好賺，執幾隻紙杯就要收$250？」他強調，「無整壞，無倒瀉嘢整污糟任何地方」，並指向對方反映飲品等問題時，對方反問為何不告知他們相關情況。最終，該party room決定只收取200元清潔費，但樓主仍然怒斥對方「呃錢」。

樓主直斥「原來開party room咁好賺，執幾隻紙杯就要收$250？」「西店Hi客之道」FB

相關帖文隨即引起熱議，不少人認為party room需為交代不清楚而負責，並指「睇相其實都唔算亂」、「乜party room唔係應該check過啲設備狀況先畀人嚟架咩？下下都要個客同你反映，意外一樣半樣就話啫，咁多嘢有問題仲好意思推返個客唔出聲？」、「Party Room好多次都係靠回頭客， 屈錢屈成咁真係自動申請執笠」、「咁都叫污糟，收250蚊執一次都幾和味」、「店西，我自己開過，客人係去玩，真係唔係去執場，執得正正常常其實已經ok」、「明顯店方好有問題，Party room同酒店近似，下一手到之前，一定係店方check過無問題先交畀下一手，如果唔係有乜損壞，你咪又可以亂屈人？」等。

另有人認為雙方也有責任，並指「其實兩邊都有問題，走嗰陣做咩唔執返好啲野？搞到有位比人入，個店舖唔一早講唔清潔會扣清潔費？遲啲再整個乜費物費扣哂成個按金啦」。

帖文來源：「西店Hi客之道」

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ