MC開騷減4KG被叫除衫洪嘉豪自爆排舞辛苦勁黑面

2022-09-03 19:00

MC(張天賦)及KAHO(洪嘉豪)一連三場的《Kaho x MC Frenemy Live 2022》昨晚（2日）在STAR HALL舉行，開騷前夕，歌迷應援物件塞爆場外，將STAR HALL變了打卡遊樂場，兩人亦作出新嘗試，以勁歌熱舞演唱會展開序幕，唱了《觸電》及《二損一》，令觀眾HIGH到飛起！跳唱完畢，兩人都喘著氣同觀眾笑道，「嘩，收貨啦？呢個開場！係咪值回票價先？」觀眾歡呼不斷，MC開心笑住話：「噚晚綵排都冇咁喘，真心有觀眾係到真係喘啲！不過我覺得自己都好似幾有跳舞天份？係咪？」觀眾即大叫 :「係呀！好正！」KAHO又即問歌迷，「我都唔弱係咪？」連隨獲得不少掌聲。

接著兩人於台上，拿出一粒大骰仔，MC笑住話：「啱啱唱完兩隻歌，而家二選一！睇吓邊個獨唱先！我哋用『殘酷骰仔』決定邊個唱先！經過噚晚綵排發現，完兩隻舞再唱Solo，其實好辛苦，所以其實我哋大家都唔想做唱先嗰個..哈哈。」最後KAHO擇骰擇中自己，MC即開心到幾乎彈上天。

到了演唱會的尾聲，兩人又再勁歌熱舞，他們異口同聲表示為演唱會付出了很多第一次，MC大爆KAHO最初排舞時不停投訴，KAHO亦自認黑面黑到爆，連MC都笑言差點發脾氣。聽到MC為演唱會減了4kg，現場觀眾即大叫「除衫！」搞到MC尷尬傻笑耍手話：「未得啦，未到呢個位....哈哈....」KAHO亦表示要多謝MC：「今次呢個騷好密集成日見，好多時好inspire我，push 我去跳舞，先有今日成績，衷心多謝你」MC更說：「多謝你喺呢段時間陪咗我啦，呢段路上有人陪差好遠，啱啱開場前，好彩有你喺後台又傾又講，我先冇咁緊張。」