衛蘭為個唱狂食南瓜令手腳掌變黃嘉賓張天賦因她小時被老竇毒打

2022-07-12 11:00

衛蘭昨晚（11日）在紅館舉行尾場演唱會，台下有霍啟剛及弟弟霍啟山、張繼聰和謝安琪夫婦、鄧麗欣、鄭融、蘇麗珊及男友、蔡思韵、湯令山女友 Moon等多位圈中好友棒場。而同一唱片公司的張天賦（MC）則出任嘉賓，現身與衛蘭合唱《心亂如麻》後，冷不防衛蘭以MC之前數次被拍到跟緋聞女友行超市來笑說：「我哋有個共通點就係經常被影到行超級市場。」逗得全場爆笑，MC就笑笑口指不懂回答。說罷二人來個相擁，繼而MC謂：「今晚做你表演嘉賓勾起了我小學嘅回憶，當我有可上網用嘅手機時就買咗你首歌《離家出走》，當時一首歌要廿蚊好貴，仲要逐樣收費，結果就嚮16蚊一碗魚蛋粉嘅時候，我收到張8百幾蚊嘅賬單，畀老竇毒打咗一鑊！」MC笑指小時已鍾意衛蘭的歌，輪到衛蘭不懂招架說：「不如你唱歌喇！」隨即返入後台換衫。獨霸舞台的MC即繞場一周笑謂：「難得響紅館當然要嘆盡個場！」未知是否過度興奮，演唱自己的歌《小心地滑》時未幾竟一度「甩嘴」，台下觀眾即報以掌聲鼓勵。

在女聲合唱環節中，於首場分享失聲經歷講足15分鐘、遭網民鬧爆「騎劫」演唱會的鍾舒漫，昨晚醒目只簡單謂：「多謝衛蘭邀請我一齊分享經歷，但我嘅故事唔係重點，重點係BE STILL！」完騷後，衛蘭眼看觀眾不肯離場，結果三度「安歌」、狂派心心和飛吻表示謝意。

雖然是尾場，但Janice靚聲依舊。

霍啟剛及霍啟山到場睇騷，啟山還拿起手提電話影相。

蘇麗珊和男友（右一及二）拍拖睇騷，旁邊的鄧麗欣（右三）細心聽歌。

張繼聰和謝安琪（左二及三）一同睇騷，Kay聽到合埋眼十分陶醉。

MC自爆小時已聽Janice的歌。

但獨唱時一度甩嘴。

衛蘭全晚表現不俗，不過受訪時她自爆因瞓得不好、其實有點疲倦，但很感恩有得開騷，並絕對希望舉行Part 2及巡唱；又透露為了演唱會一直積極健身和節食，因長期只食低卡及飽肚的南瓜減肥，導致手掌和腳板變黃，一度令人擔心以為她有肝病，強調身體沒問題。

談及表演嘉賓，衛蘭自覺跟MC真的有緣，因自己也經常被影到逛超級市場，尷尬稱還是在買購買女性衛生用品。至於鍾舒漫被指騎劫了她的演唱會，衛蘭撐好友說：「係我請佢做分享，可能佢太過激動同感動，忽略咗時間，我知道佢為咗咁而唔開心，我勸佢唔使介意，能夠喺台上分享自己脆弱一面係唔容易。」而到後台與衛蘭一同祝捷的鍾舒漫就負評表示：「真心理解網民嘅想法，亦嬲自己分享時亂章同緊張，又喺時間上跟團隊溝通錯誤，覺得唔應該喺人哋嘅演唱會講自己嘅事，雖然有唔開心，但都覺得大家嘅評語係合理。」