白色強人II丨馬國明拍劇有使命感爆唐詩詠早年已呻有倦意

2022-09-01 22:45

馬國明(馬明)、郭晉安、張曦文等今晚出席《白色強人II》慰勞宴，會上監製羅永賢表示患有「結節性硬化症」的病人因該劇而得到大眾注意，令政府更加快其一站式醫療進度，令他感到很開心。馬明對於今次劇集能間接令罕見病患者得到幫助，作為演員來説覺得很感動，相比起收視或是得到任何獎項也來得更為開心，他說：「拍劇係娛樂觀眾，如果今次真係為病人做到一啲嘢係好開心，演員拍劇諗住觀眾鍾意睇就算，諗唔到呢套劇真係對社會有影響，真真正正幫到病人。」若開拍第三集，他也樂意接拍，更笑言：「我以前唔夠努力讀書做唔到醫生，幫唔到病人，𠵱家咁樣可以幫到病人，真係好有使命感。」

馬國明拍《白色強人II》，開心可以幫到病人。

幫到罕見病患者得，作為演員的馬明覺得很感動。

《白色強人II》今晚舉行慰勞宴。

呷家中小貓醋

提到馬明女友湯洛雯早前到了澳洲工作，他指女友已返港並已完成酒店隔離，又自爆出席活動前已從酒店送她返家進行居家隔離，問到會否為女友下廚，馬明笑説：「買啲嘢打邊爐囉，未決定，因為佢都係啱啱返屋企。」至於可有小別勝新婚的感覺？他卻帶點醋意說：「只係幾日啫，佢掛住啲貓多啲。」

馬明指靚湯掛住家中啲貓多啲。

馬明同靚湯只係小別幾日，未有小別勝新婚的感覺。

另外，對於有消息指唐詩詠將離巢，馬明表示完全不知道，並指一向不會過問對方關於合約的事情，不過，他都有聽過唐詩詠對舞台劇感興趣，想做舞台劇。馬明更爆詩詠早幾年已經向他提及有倦意：「入行初期已經話拍劇攰，可能女仔捱更抵夜會覺得辛苦啲。」而馬明認為對方的去留是很個人的選擇：「我相信無論佢做咩決定，《鐵馬》嘅兄弟都會支持佢。」