失衡凶間丨蘇麗珊眾目睽睽換衫變裝好尷尬林曉峰血流披面商場逃亡

2022-08-29 09:00

林曉峰（阿Lo）與蘇麗珊新片《失衡凶間》其中故事《死場》，分別化身KOL，一個聘請臨記扮顧客搞宣傳谷商場，一個踢爆商場鬧鬼。深夜時份人去樓空，阿Lo疑似被鬼追，「探靈KOL」蘇麗珊隨後追上直播，在商場喪跑展開追逐戰。

阿Lo說：「頭先跑勻整個商場，半個馬拉松，依家㷫烚烚。剛才我哋喺商場喪跑，不過對鞋好跣，所以只係上半身扮到好似跑得好快，但對腳其實係急步行，好驚跣低。」追住跑的蘇麗珊說：「我盡晒力跑，喺後面拍直播，追到氣喘！」今次不但展示阿Lo長跑專長，還充份發揮他好口才一面。因為他飾演口才了得的KOL，自導自演商場人流旺盛場面，一講就幾頁紙對白，蘇麗珊拍晒手掌。

林曉峰喺新片《失衡凶間》其中故事《死場》化身KOL。

阿Lo話要喺商場喪跑，不過對鞋好跣，好驚跌親。

阿Lo一講就幾頁紙對白，蘇麗珊拍晒手掌。

蘇麗珊一改過往乖乖女形象。

要眾目睽睽下換衫變裝，蘇麗珊話都幾尷尬。

阿Lo說：「導演陳果仲勁，佢親自揸機拍攝，又一邊留意住我有冇講錯對白，仲一邊指揮鏡頭外其他工作人員。」話口未完，陳果導演在他們身後走過，阿Lo對蘇麗珊說：「你留意吓佢對手成日都好似打功夫動作，功架十足。」兩個百厭星細聲講大聲笑。

戲中蘇麗珊一改過往乖乖女形象，戴白色假髮還在眾目睽睽下換衫變裝，她說：「第一場戲就係我嘅出場戲，我要喺短時間內除帽、除口罩、除衫，仲要摺好放返入背囊，然後攞出攝影機、開燈、自拍，眼看同場其他群眾演員，個個望住我等我做晒呢一連串動作，再講對白。我心情真係好緊張，因為拍攝時間好緊湊，好怕做漏嘢連累大家重頭嚟過NG累街坊，好大壓力！」結果拍攝順利完成，她笑言要感謝剪接師幫忙，還說：「估唔到第一日開工就對住咁多人除衫，真係有啲尷尬！」