獨家丨蘇麗珊唔排除有BB先結婚　梁雍婷想化身岑珈其勁溝女

蘇麗珊（Cecilia）和梁雍婷（Rachel）近日在電影《緣路山旮旯》中合作，分別飾演對男主角岑珈其欲拒還迎的「A Lee」和拜金女「Mena」，兩人都話同角色唔多似，不過大讚角色好玩，Rachel更搞笑謂想化身珈其溝晒全部女拍檔。電影探討香港土地問題，兩人都承認確實有影響到感情生活，而被睇好最快結婚的Cecilia，講明好想生BB，更唔排除到時先結婚。採訪：杜杜 攝影：譚志光　髮型：Sing Tam@ArtifyLab(Cecilia)、Oscar Ngan@ii ALCHEMY　hair(Rachel)　化妝：Rainbow@Annie G Chan Make Up Centre(Cecilia)、Deep Choi(Rachel) 　服飾：Whistles(Cecilia)、alice + olivia、De Beers(Rachel)

Rachel和Cecilia在《緣路山旮旯》中角色，兩人都覺得好好玩。

 

Cecilia謂跟男友感情穩定，跟對方家人關係亦不錯。

 

Rachel認為一段關係開心就好，不一定靠婚姻維繫。

Cecilia和Rachel都覺得今次角色好好玩，Cecilia笑指平時不似角色會吊男人癮，但因曾經住在上水，所以如果對對方沒好感，也不會讓對方送返屋企，「嗰時真係住得太遠，出親嚟都要預一個鐘以上，都唔好意思叫人哋送，一來一回都要兩個幾鐘嘛！同埋畀得佢送返屋企，其實都係代表咗啲嘢啦！」

Cecilia戲中飾演對男主角岑珈其欲拒還迎的「A Lee」。

 

電影中，Rachel演巴辣拜金女「Mena」。

角色講Rachel手車好辣，但現實她唔識得揸車。

反差大過戲癮

Rachel話今次演同自己反差好大的角色，可以過足戲癮，「我本身唔係咁物質主義，同埋角色手車好辣，我其實係唔識揸車，所以角色同自己有好多方面都唔同，咁樣反而特別好玩，我仲專登睇朋友揸車去模仿，有啲位就唔到先至搵替身演。」原來連Cecilia都恨演Rachel的角色，「我哋幾個女主角都討論過，個個都最想演佢呢個角色，因為好好玩，又可以鬧爆岑珈其喎！」不過畀Rachel有得選擇，她竟然會揀岑珈其演的「阿厚」，「可以追晒咁多個女仔喎！𠵱家冇所謂，唔一定要男仔先可以追女仔㗎嘛！」

戲中岑珈其跟5個女主角都有感情戲，當中包括Rachel。

 

對結婚和生BB都冇興趣的Rachel，寧願花心思照顧狗狗。

對婚姻沒憧憬

談到土地問題，Cecilia和Rachel都承認難免會影響感情生活，身邊朋友好多更因住屋問題，搞到結婚計劃被打亂。跟圈外男友拍拖多時的Rachel話，認為拍拖唔一定要結婚，但若然同居都會要求跟家人住得近，「我本身住香港仔，拍拖嘅時候住得遠，真係冇乜所謂，但如果同居嘅時候，我都想住返近啲香港仔，因為有時想返屋企探屋企人，都唔使去咁遠。」講到戲中幾位未婚女演員中，大家都睇好跟圈外男友不時放閃的Cecilia最早出嫁，她就笑言近期已少了放閃，但講到結婚，她坦承可能成長在單親家庭，對婚姻沒有太多憧憬，反而好想生小朋友，「結婚真係完全冇計劃，因為唔覺得一定要結婚，但我好鍾意小朋友，不過暫時仲有好多嘢想做，如果我做得媽咪唔會想分心，所以短期內都唔會諗住，或者到想生BB先諗結婚囉！」

跟圈外男友Kenny感情穩定的Cecilia，笑言最近很少放閃。

 

Cecilia見到好姐妹湯怡B女咁得意，令她更加恨生BB。

 

立即下載 | 全新《星島頭條》APP https://bit.ly/3yLrgYZ