古天后日志｜中免IPO吸引资金流入 重磅股业绩决定资金去留

8月15日，大致天晴，日间天气酷热，但局部地区有骤雨，炎热天气持续。美股上周五保持升势，道指升424点；标指升72点；纳指再升逾2%，升267点。暂时美股三大指数已升穿下降轨顶部，反弹势头不变。上周美国已通过2800亿美元晶片及科技去案，周末期指众议院再通过4300亿美元通胀削减法案，市场暂时乐观情绪仍然高涨，但以目前通胀仍然高企下，市场有否过份乐观，仍有待确认。

虽然美股全面向好，但五大中企包括中石油、中石化、中人寿、中国铝业、上石化宣布从ADR退市，拖累中概股走弱。虽然呢几只股份一向喺ADR都无乜睇头，但佢哋宣布退市ADR，对中概股嘅气氛点都有啲影响。唔排除之后又更多中企从ADR退市。

港股暂时无乜方向

再有美国议会议员到访台湾，台海局势维持紧张局面，港股暂时无乜方向，能守喺20000点之上已经系万幸，今个星期唔少蓝筹股公布业绩，周五又到恒指服务公司进行季检，留意可能左右后市走势。港股一直喺二万水平徘徊，成交持续萎缩，上周五成交额只有750亿元，成交淡静反映港股仍然未有资金流入，20000水平淡友亦懒得去追沽，因为值博率唔高。再睇埋以目前港股嘅规模，期指成交亦缩减，好明显连大户亦无心恋战，个股自然难炒，就连指数单日波幅亦缩水，期指炒友亦见搵食艰难。

今个星期中免招股，有机会成为本来度最大集资额新股，港元略为转强，话晒系大型IPO，有返啲钱流入都正常。至于流入参与新股嘅资金，会否喺中免IPO后继续留喺港股玩落去，今个星期嘅重磅股派成绩表，若然能交出理想业绩，或有机会令呢笔资金留喺港股玩多阵。相反，重磅股业绩强差人意，认购新股资金喺IPO完成后，亦会毫不客气，头也不回地流走。

古天后

(徐狄怡，证监会持牌人)