痞子殿下丨周嘉洛犧牲色相全裸露股演出為求效果好二話不說臨場答應

2022-08-03 14:00

周嘉洛、陳瀅、王灝兒（JW）、朱敏瀚及張頴康主演的TVB新劇《痞子殿下》，本周一（1日）剛推出，被力捧的男主角、飾紀威一角的周嘉洛在昨晚播出第2集更犧牲色相，全裸露股演出！劇情講到張頴康飾的范壯龍打算偷看陳瀅飾的納克溫柔沖涼，但原來正在洗白白的其實是紀威，紀威即時企起身鬧爆壯龍淫賊，豈料壯龍反過來威脅紀威說：「你知唔知每個男人心裏面都有座山架？係斷背山呀！」周嘉洛露股雖然只約短短1秒，但網友都大為「驚艷」及好奇留言：「係唔係真身呀？」

監製陳耀全透露嘉洛拍攝相關場口，周嘉洛原本有著肉色褲打底，但為了效果更逼真，監製建議全裸上陣，難得周嘉洛二話不說答應，即時做足安全措施：「監製同我一齊去，主要用牛皮膠紙黐住敏感位置。」搣膠紙時會否好痛？周嘉洛笑謂：「都唔會痛，因為一浸落水度啲膠紙就會甩，反而係起身時驚穿崩，好彩前面得張頴康一個，佢見到膠紙就甩都擰轉面，好似仲講咗句：『我唔想睇，唔好逼我！』」

周嘉洛被力捧做男主角，盡現搞笑細胞。

原先周嘉洛有穿打底褲。

但為求有更好效果，最後周嘉洛全裸上陣。

果然瞓身演出。

昨晚另一亮點是張頴康、朱敏瀚、陳瀅及JW聯手設局嚇周嘉洛，圖喚醒其失去的記憶；該場戲可說是周嘉洛表演獨腳戲，「一輪嘴」式揭穿眾人詭計的喜感及節奏感十足，據知此場戲周嘉洛和監製齊齊研究對白，最終再度出了半頁紙，相當認真。而該場戲中張頴康的表情及舉動同樣充滿喜劇效果，而他亦坦言今次拍此劇，自己跟JW最忍不到笑。