獨家丨黃秋生常被網民問候老竇︰一係叫你食屎啦 重演舞台劇《ART呃》 開到口呷子華醋

2022-08-03 02:00
秋生訪問時叫朱康稱他做「細佬」,因有感現在是非已顛倒。
秋生訪問時叫朱康稱他做「細佬」,因有感現在是非已顛倒。

黃秋生、陳淑儀和朱栢康繼去年8月合演舞台劇《ART呃》後,今年10月重演,暫開8場。這段日子,秋生都在台灣拍攝飲食節目,未有再踏舞台,所以他用「復出」來形容,講到香港觀眾好掛住佢,秋生突然醋意大發,扁嘴表示觀眾掛住近期演舞台劇《最後禮物》的黃子華多啲,仲舉例證明佢唔係齋講。提到偶然同網民有爭論,秋生笑言,「你同佢講乜都好,佢都係叫你食屎啦。」採訪:杜杜 攝影:沈健程 髮型:Taky Chung@AdmiX Hair Styling(秋生)、Ray Mork@AdmiX Hair Styling(朱康及淑儀) 化妝:Jolinn NG(秋生)、Maggie Lee(朱康及淑儀) 服裝:Rule Crossing Man(秋生) 場地:13A New Street Art Gallery(秋生)

朱康、秋生和陳淑儀戲內拗餐死,私底下有講有笑好好傾。
朱康、秋生和陳淑儀戲內拗餐死,私底下有講有笑好好傾。

 

朱康承認上年第一次面對秋生和陳淑儀演出,壓力好大。
朱康承認上年第一次面對秋生和陳淑儀演出,壓力好大。

 

陳淑儀話雖然今次劇本跟去年一樣,但綵排可能會擦出新火花。
陳淑儀話雖然今次劇本跟去年一樣,但綵排可能會擦出新火花。

去年《ART呃》一演十五場,相隔一年多重演,三位主角都受不確定因素影響心情,秋生話:「好似踩鋼線咁,又唔知到時點樣,見步行步啦!」朱康就認為,「今日唔知聽日事,有得聚埋一齊,我好珍惜呢樣嘢。」問到兩次演出會否有不同?陳淑儀認為劇本雖然一樣,但要睇綵排時大家會否撞出不同的新火花。秋生稱朱康上次演出壓力特別大,「佢個人比較慢熱,搞十日都係天黑但一滴水都冇,唔知搞到幾時,但跟住就滂沱大雨,佢係後勁強嘅馬,前面包尾,後面一條大直路跑上嚟,變咗佢嘅壓力就好大嘞!」朱康承認上次腦交戰,今次有了經驗會好得多。

舞台劇《ART呃》,將於10月28日假演藝學院演出。
舞台劇《ART呃》,將於10月28日假演藝學院演出。

 

朱康戲中有不少情緒爆發戲份。
朱康戲中有不少情緒爆發戲份。

同網民爭拗「嘟」咗算

劇中講三位老友為了一幅藝術品而爭拗,綵排時也會爭論如何演繹,秋生笑指連叫外賣都會拗一餐,問他是否跟網民拗得最多?他就繼續搞笑話:「唔使爭論㗎 !唔啱聽咪『嘟』咗佢(即刪除),一隻手搞掂,最多咪答一句,因為第一唔識佢;第二都唔知係咪AI嚟,有啲淨係識講兩樣嘢,一係叫你食屎,一係問候你老竇,你同佢講乜都好,佢都係叫『你食屎啦!』,不停都係呢句,『嘟』咗佢咪算。」

去年8月,《ART呃》一連演出十五場。
去年8月,《ART呃》一連演出十五場。

 

去年演出尾場時,秋生已事先張揚會今年「復出」。
去年演出尾場時,秋生已事先張揚會今年「復出」。

去年演出《ART呃》尾場時,秋生曾表示「明年復出」,他承認重演即是復出,「我成日都唔記得告別,所以我唔會告別,但係我不停咁復出,哈哈!」提到相隔年多才跟香港觀眾見面,會令觀眾好掛住,秋生聽到即答得好葡萄:「係咪真㗎?我覺得佢哋掛住黃子華多過我喎!佢哋掛住黃子華多過我起碼5倍,佢演四十場,我得八場!我如果加到十五場時,咪3.5倍咁囉!如果我開到四十場,佢哋鍾意我同鍾意佢係一樣囉!」不過秋生認為開四十場冇可能,「有咁嘅觀眾量,都冇咁嘅場地啦!」

黃子華跟潘燦良合演的舞台劇《最後禮物》,共演出四十場。
黃子華跟潘燦良合演的舞台劇《最後禮物》,共演出四十場。

 

秋生在台灣時曾為網台拍攝飲食節目《開著餐車交朋友》。
秋生在台灣時曾為網台拍攝飲食節目《開著餐車交朋友》。

台灣出小說似被追債

秋生去年在台灣推出小說《黎根的天台》,他也估不到因疫情而衍生此機會,「我喺台灣識咗個出版社嘅社長,佢本文學雜誌喺台灣好出名,佢又有搞出版,我返咗香港隔離,悶起嚟開始寫故仔,擺咗上fb,突然收到台灣朋友電話話『社長叫你唔好再擺上去喎』,幾驚佢話我文筆唔好,唔好再擺上去丟架!點知佢話『叫你留返個故仔畀佢哋登』,我一吓就答應人家,我係好鍾意一吓就答應人,你問我結婚好唔好我都會話好,但係跟住就會後悔!哈哈!」秋生隔離期間仍未寫完小說,社長不停追稿,似被追債一樣,但完成後都有開心事,「台灣書展就出咗雙封面,佢哋話『雜誌社試過兩個人出雙封面,一個係你,一個係張愛玲』,講完呢樣嘢就開始驚,佢又再追稿。」

 

秋生隔離時在網上連載小說《黎根的天台》,獲出版社邀請後便暫停。
秋生隔離時在網上連載小說《黎根的天台》,獲出版社邀請後便暫停。

 

秋生獲台灣文學雜誌邀請寫小說,還成為雙封面人物。
秋生獲台灣文學雜誌邀請寫小說,還成為雙封面人物。

秋生曾在社交平台透露有意開演唱會,他就笑指有意開「輪迴」演唱會,「我長期隔離,冇人同我講嘢,發覺失聲呀!把聲又沙,講嘢仲走音𠻹!自己同自己講嘢都跣胎,咁好得人驚,一個演員冇咗把聲就死啦!跟住要去打針嘛!打完針回春呀!我喺屋企彈結他把聲可以去返個高音,唔知我打咗咩針,可能係女性賀爾蒙!哈哈!跟住搵朋友練歌,都幾十歲不如搞返個演唱會啦!我呢個叫做復刻搖滾世界輪迴!我笠住個地拖頭唱呀!」

秋生笑言近日練歌是為了開「輪迴」演唱會。
秋生笑言近日練歌是為了開「輪迴」演唱會。

 

星島新聞集團慶回歸25周年專題網站,請即瀏覽

立即下載 | 全新《星島頭條》APP https://bit.ly/3yLrgYZ

 

關鍵字

最新回應

關鍵字

相關新聞

熱門文章