MIRROR演唱會丨Frankie講感言踏空跌落台擦損手 嚇死Fans鞠躬道歉

MIRROR首個紅館Show昨晚（25日）開鑼，開騷前一晚已經爆出有舞蹈員投訴表演時的安全問題，開Show後見到舞蹈員落力跳以為問題已解決，原來未解決之餘發現問題更加多。

有大量「鏡粉」（fans暱稱）非常關注演唱會舞台的安全問題，指出四面台機關重重非常危險。首場尾聲，Anson Kong及Lokman演唱 《虎道門》時，二人打對面在升降台跳唱，AK的升降台突然出現一下搖晃令他失平衡，險跌落舞台嚇親Fans，好彩AK身手敏捷隨即企穩先冇事。「生粉」（AKfans暱稱）湧入MIRROR FB Page留言鬧爆主辦單位唔顧及鏡仔安全，強烈要求12子「平地表演」。

話口未完，今日第二場中段，陳瑞輝（Frankie）在高台發表感言時叉錯腳跌落台，其實佢踏出一步預備落腳時，Fans已經叫佢唔好行，但已經趕唔切，好彩個台唔係太高，佢落地時已經立即起身話自己冇事，但已經嚇到歌迷個個起身了解。事後Frankie因為令觀眾擔心而鞠躬道歉，之後再跟隊友大合唱，相信隊友都嚇親，而AK更拖一拖佢作出安慰，之後Frankie走近觀眾前揮手打招呼，仲識笑添，Fans應該安樂晒。而Frankie亦有出PO展示傷勢話自己只係擦損咗，仲笑笑口話自己福大命大，真係激死人。

Frankie投入講感言。

因為太投入而叉錯腳。

嚇死人咩。

另一角度睇，雖然個台唔算高但扭親都唔好啦。

因為自己大意嚇親觀眾，Frankie鞠躬道歉。

隊友慰問佢。

暖男AK拖一拖皮皮問候。

冇事嘞，仲識笑添。

出PO展示傷勢。

星島新聞集團慶回歸25周年專題網站，請即瀏覽

立即下載 | 全新《星島頭條》APP : https://bit.ly/3yLrg