黃夏蕙緊張上頭炷香有原因被誤會博見報自爆有錢過祥嫂

2022-07-24 07:00

89歲黃夏蕙將於8月11日飛往美國，外出走走兼進行巡迴演唱。她接受港台《舊日的足跡》訪問時，表示希望趕到返港上頭炷香，否則就會去美國三藩市的黃大仙供奉，笑言好期待扮兔仔，跟美國那些穿短裙、戴頭箍的兔女郎一樣作性感打扮。

夏蕙姨解釋她每年必定去上頭炷香是因為迷信，「初時我哋四個好朋友，司徒關佩英、鄧碧雲同鳳凰女會去，祥嫂（洪金梅）偶然都會到。有一年司徒關佩英冇去，嗰一年佢自殺；又有一年鄧碧雲入醫院，結果冇去，又出事；鳳凰女去咗美國冇去到嗰年，又傳嚟噩耗；嗰一年祥哥祥嫂有去，但係第二年冇去，又出現家變。我好驚好驚，每一年佢哋唔去，我都一定要去。」

黃夏蕙接受車淑梅訪問。

夏蕙BB話好期待明年扮兔女郎。

黃夏蕙將同現任老公潘炳烈一齊返美國。

夏蕙姨係著名嘅「頭炷香KOL」。

夏蕙姨上一次去美國是2019年，甫下機便接獲祥嫂入院繼而離世的消息，她謂當時不能置信。她憶述祥嫂17歲時兩人便認識，形容對方為完美女性，事事以家庭為重。「嗰陣時祥哥日日都要食燕窩，佢親自揀得好乾淨。祥哥食完，佢用啲水撈一吓煲底就自己飲。」祥嫂家變，夏蕙嫂經常陪伴左右，卻被指博出位、博見報，夏蕙姨笑說：「而家我都冇後悔幫佢，我哋係好姊妹。當時啲人話祥嫂嘅身家一定畀晒黃夏蕙，哈哈！其實我仲有錢過佢，嗰陣我老公胡百全一個月畀我10萬蚊生活費。」

難忘派避孕袋畀年青人

夏蕙姨是個玩得之人，現時多被人暱稱做夏蕙 BB。「我唔知大家幾時改口叫我做BB，又叫我做女神。可能佢哋覺得我幼稚啩！我去派避孕袋，啲年青人好驚，我鼓勵佢哋攞一個，保護自己，唔用就送畀爸爸，嘩！結果反應好好，個個都嘻嘻哈哈同我影相，其實派避孕袋同派米都差唔多。有一次我話去參選區議員，其實我係想人哋聽到我嘅聲音。而家啲方艙醫院造得咁靚咁好，點解唔用嚟畀啲老人家住？好多老人院好逼，（病毒容易）一個傳一個，希望超哥特首（李家超）畀啲老人入住方艙醫院。我嘅最大心願都係有一間老人院，生養死葬一條龍服務。不過而家十劃都冇一撇，因為（社會）呢三年嚟都民不聊生。」

黃夏蕙跟已故祥嫂（後排左一）和已故鄧碧雲（前排右一）係十多年朋友。

祥嫂當年家變，夏蕙姨陪伴左右。

夏蕙姨是次美國之行也為與兒孫共聚天倫。她與前夫胡百全育有四子兩女，坦言當年全無社交活動，及至胡百全離世，她才偶爾去看賽車。香港賽車之父潘炳烈後來成為她的丈夫。「我同佢係世交，我欣賞佢能人所不能，落到賽場可以由頭帶到尾。佢都離過婚兩次，後來我哋決定一齊去美國居留，所以我就結婚。」她感慨這次離開香港最不捨的是跟朋友的感情：「希望大家都健康快樂，得饒人處且饒人，記得種瓜得瓜、種豆得豆，唔好傷害人。希望世界和平，因為如果我可以風花雪月，人家就淒淒涼涼，個心點過意得去？」