獨家丨黃夏蕙唔擔心一去不返:拜拜香港有緣再會坐小輪遊維港爆移民原因

2022-07-22 02:00

「頭炷香KOL」黃夏蕙(夏蕙BB)將於下月11日隨老伴潘炳烈移民美國，跟家人共享天倫之樂。臨別秋波，夏蕙BB帶《頭條日報》記者坐天星小輪重拾當年回憶。一臉不捨的夏蕙BB全程表現感觸：「呢幾十年間，香港呢個『東方之珠』帶畀我嘅幸福生活，拜拜喇，有缘再會！」離別前，她寄語香港人要努力加油，保持身體健康，明天會更好。採訪：方騫平攝影：沈健程

夏蕙BB向港人揮手講再見，並澄清只係89歲，未到9字頭。

黃夏蕙大讚香港好值得留戀。

當日黃夏蕙身穿黑色短裙仔，腳踏鬆糕鞋喺天星碼頭周圍行搵位影相，表現活躍完全唔似91歲嘅老人家。夏蕙BB指各大傳媒都「炒晒車」，她透過本報作出「澄清」：「我係1933年香港出生，肖雞，𠵱家只係89歲。」

夏蕙BB喺天星碼頭周圍行搵位影相。

如同巨星出巡受歡迎

可能日前出Po宣佈快將離港，當日夏蕙BB所到之處，均深受大人細路歡迎，如同巨星出巡，途人均叮囑她要保重，𠱁得夏蕙BB不知幾歡喜，有求必應玩selfie，仲叫人違規除口罩影相會好睇啲。見到途人影嘅相好靚，夏蕙BB更大方畀電話號碼途人用作回圖。唔少人話「鍾意佢靚」、「唔捨得冇咗佢上頭炷香」、途人謝先生更上前同BB抱抱說：「我鍾意佢夠親切。」

黃夏蕙深受大人細路歡迎，個個埋身求合照。

夏蕙BB所到之處都被圍，個個舉手機同佢影相。

男途人謝先生跟夏蕙BB情深擁抱，表示有緣再會。

以往大年初一凌晨，黃夏蕙都悉心打扮去黃大仙祠上頭炷香，是著名的「頭炷香KOL」。

之後BB就行去幫襯軟雪糕車，品嚐人生第一杯及離港前最後一杯嘅軟雪糕，雪糕車哥哥用心為她炮製一杯「完美6圈半雪糕」，更表示夏蕙BB帶咗好多歡樂畀香港人，「真係唔捨得你呀。」舔著融化中嘅雪糕，夏蕙BB個心亦被融化：「杯雪糕好靚、好好食、好細膩。」

雪糕車哥哥為黃夏蕙炮製一杯「完美6圈半雪糕」。

遺憾創立老人院受阻

黃夏蕙好愛香港但堅持要走：「屋企四代同堂，要返去見吓啲曾孫，唔知適唔適應新生活㗎！Plan咗先去登台9個月，再環遊世界relax吓，開心咪留耐啲囉。」在旁嘅經理人Simon踢爆BB適應力低，最長一次去咗美國4個月就喊住要走。

黃夏蕙跟胡百全育有7名子女。有么女胡雲妮（右二）、長女胡蓮娜（右三）、長子胡禮賢（左二）、么子胡禮智（左一）、黃夏蕙（前排左一）及胡百全（前排中）。

夏蕙BB跟香港前「車神」老公潘炳烈係恩愛夫妻。

問到BB點解要走?她爆出一直收埋喺心嘅必走理由：「睇見幾十年嘅老友洪金梅(祥嫂)、鄧碧雲、鳳凰女、李香琴、譚炳文、司徒關佩英等陸續離開，身邊冇晒真正知己，得返自己一個好慘，感覺好孤獨想行開吓，但我唔會因為咁樣厭世，反而更珍惜短暫嘅生命做啲嘢去幫人，自己好幸福，不過有好多老人家冇錢入住老人院，流離失所…最遺憾受疫情影響，名下慈善基金創立老人院計劃受阻，離港後要交由契仔接手處理。」