古天后日誌｜減關稅消息一旦落實或成好消息出貨

7月11日，天晴，天氣酷熱。上周五美股表現反覆偏軟，道指跟納指分別跌46點及3點；納指則升13點。雖然美股上周反彈，但標指跟納指周五已升抵阻力位，加上入市資金有減少，似乎單日波幅擴大，令唔少投資者開鈶卻步，美股漸漸步入無方向狀態。嚟緊美股將開始業績期，一旦美企業績交唔到功課，美股料有一波震盪。

另一方面，就業指數目前仍然強勁，空置職位超過千萬份，失業率保持喺3.6%低位，6月新增職位仍有37萬份，空置跟失業比例仍高達2比1，呢個就業數據令美國有條件喺7月繼續加息。只不過唔少企業喺6月開始提出裁員，要留意未來兩月就業市場變化。至於7月底議息需要加息0.75%已廣為市場接受，而市場亦普遍相信至今年式，息率將加至3.5%，30年債正正高企於3.5%水平，而10年債息亦重返3%之上。當息率升至3.5%水平，亦預示經濟有機會步入衰退，經濟衰退嘅情況下，息率將有下調空間，呢個亦係資金沽短債買長債，令長短息出現倒掛嘅原因。

港股未見有好消息

至於港股呢邊，暫時未見再有好消息出嚟，7月1日回歸亦未見內地有向港送大禮，而有關美國放寛對華關稅，亦一直只聞樓梯響，喺無乜利好消息下，港股只有喺現水平先作整固，暫時大市喺21000至22000之間上落。

不過就算美國方面就放寬關稅，都唔係天大好消息，留意返美國嗰邊主要係為咗壓抑通賬而傾向只放寛消費品關稅，貨品綼值大約喺100億美元左右，但同時有意限制科技類產品進口，受影響貨品總值可能達300億美元。中美貿易戰已持續四年，加上呢兩三年疫情期間，為咗解決供應鏈問題，唔少本來喺內地嘅生產線，早已遷至東南亞地區，甚至回美國，已搬走嘅生產線，並唔會再搬返去內地，即係減唔減關稅，對減低生產成本嘅幫助，已唔算好大。即係減關稅消息就算落實，亦未必對中港兩地股市有重大利好支持，反而有機會係好消息出貨。

古天后

(徐狄怡，證監會持牌人)