古巨基欣賞後輩主動邀請合唱 Edan拍MV終體會「前夫」感受

2022-06-23 09:00

多年沒出唱片的古巨基，昨日（22日）推出《I Really Love To Sing》合唱專輯第一炮，請來MIRROR的呂爵安（Edan）合唱《飄流教室》打頭陣，他坦言：「《飄》當年冇被安排成為主打，所以好想搵一個心儀嘅人一齊唱呢首歌。今次新編曲好classy，配古典鋼琴，上次睇MIRROR騷，對Edan鋼琴自彈自唱印象好深，覺得非佢莫屬。」Edan則受寵若驚，他謂：「真係好開心，當初好記得花姐（經理人黃慧君）同我講：『喂！古生話想搵你合唱喎，你肯唔肯呀？』嘩！梗係好啦！因為未試過同一個大前輩合作，同埋我細個都有聽古Sir啲歌，所以覺得呢件事係好神奇！」Edan又表示錄音期間獲益不少：「古Sir每次都會嚟監製我錄音，畀咗我好多指導，令我對唱歌多咗好多想法。古Sir真係好貼心，任何事都好樂意教我、幫我，好多謝佢！」

古巨基跟Edan及Natalie合作愉快。

基仔亦對Edna讚不絕口：「我記得佢話知道自己唱歌未必係最好，所以只要有其他唔同嘅機會，佢一定會好願意同埋畀心機去試！佢係一個好謙虛、好勤力嘅藝人。喺錄音過程裏面，我發現Edan喺假音上係好好，擁有一把好靚好滑溜嘅假音。」

Edan自彈自唱，令基仔留下深刻印象。

MV中Edan和Natalie扮演小情侶。

兩人扮學生，毫無違和感。

此外，今次MV除了找來Edan兼任男主角外，女主角請來80年代女神柏安妮的17歲女兒、新進女演員許恩怡（Natalie）擔任，MV其中一幕講述Edan與心儀的Natalie去基仔的新碟簽名會，Edan笑說：「今次感受到『前夫』嘅感覺，即係陪個女仔去見佢嘅偶像。」而基仔則覺得這個MV很有穿越感，「MV呢幕講番2012年《告別我的戀人們》呢一隻碟出嘅時候，我特登整番當時個髮型，連件褸都係搵番當時宣傳嗰件褸，仲着得落，即係冇肥到！」