古天后日誌｜螞蟻重啟IPO消息彈出彈入 叫人無所適從

6月10日，大致多雲，間中有驟雨及狂風雷暴，美股隔晚三大指數下跌，道指跌638點；標指跟納指跌逾2%，分別跌97點及332點。投資者關注今晚公布嘅5月消費者指數CPI，目前市場普遍預期消費者物價指數從4月的8.3%，降到8.2%。雖然數字預示通脹有機會見頂，但預示油價短期內難以回落嘅同時，通脹緩和可能同需求減少有關，即經濟有機會陷入衰退，美國或陷入最難搞嘅滯脹環境。

與此同時，歐洲央行亦開始放鷹，雖然6月利率維持不變，但已表明喺7月份始加息，德國債息應聲升至1.45%，意大利債息升至3.6%高位。此情此景下，歐美股市短期難有作為，即使期間有反彈，都只不過係熊市中嘅反彈，美股不宜戀戰，反而每次反彈，可以收集指數反向產品如SQQQ等。美國10年期債息一直高企於3厘之上，亦係令美股維持弱勢嘅原因，一旦債息再向上，定會引發美股新一輪跌浪，甚至跌穿前底。

至於港股呢邊，古天后喺過去兩日多次強調，指由20000邊反彈至22000水平，反彈幅度已達一成，噚日恒指更一度高見22142點，不過高位未能站穩腳，22000關亦得而復失。不過喺現貨收市後，市場一度傳出阿里巴巴(09988)持股約三成嘅金融科技公司螞蟻集團重啟上市，但傳聞喺黃昏過後，已遭螞蟻否認。中國證監會其後亦表示，未有進行有關螞蟻重啟上市嘅評估及研究工作。

夜期飊升 曇花一現

夜期一度因為傳聞已飊升至22200點水平，但高位僅曇花一現，其後夜期更隨美股顯著向下，阿里巴巴美股急跌8.13%，收報109.9美元。雖然螞蟻已否認相關傳聞，但古天后相信喺螞蟻整改完成後，從新上市係遲早嘅事，只係今次即市再上市，估值已大不如前，難跟兩年前上市嘅市值相題並論。

不過螞蟻能否重啟IPO，對於內地科網股嚟講，係一個利好消息，呢個亦係古天后認為中港股喺下半年表現有機會步入佳境嘅原因。只係目前美股搖搖欲墜，短期美股或有機會引發一次較大型震盪，不妨耐心等候呢一刻嘅出現，屆時再趁調整入市，總好過喺22000水平嚟追貨。全球股市仍處於熊市之中，熊市反彈往往令缸邊友意亂情迷，每一次反彈如按捺不住追貨，資金就被鎖死，最終又捱唔過熊市跌幅而於低位打靶，到咗低位可以收集嘅時候，手上已再無子彈買貨，然後又再努力儲入子彈，至下一個升浪嘅尾升，再次追貨，一直惡性偱環，永遠逃唔過成為韭菜被割嘅命運。

古天后

(徐狄怡，證監會持牌人)