獨家丨黎美言封鎖舊隊友手機號碼過新生活終極爆料轟被張紋嘉搞到抑鬱

2022-05-13 07:00

前女子組合HotCha成員張惠雅（Regen）接受電台訪問時力數黎美言（Winkie）性格好煩兼難頂，被焫㷫的Winkie忍無可忍，向《頭條日報》記者公開收埋心底15年嘅鬱結，力斥除咗被兩位舊隊友張惠雅及張紋嘉（Crystal）傷害名聲外，連人身安全都受到威脅：「兩人身邊嘅朋友騷擾我生活，𠵱家要借用媒體力量嚟保護自己！」她直言已封鎖Regen及Crystal電話號碼，希望能安心重過新生活。對於Winkie言論，截稿前兩位舊隊友未有回應。採訪：方騫平攝影：沈健程場地：富德紅人堂

Winkie形容自己處於懸崖邊，自言本性善良嘅佢迫於反擊。

Winkie自爆提及HotCha感到傷痛。

HotCha於2007年出道，14年拆夥，黎美言由藝人轉型從商6年，開辦泰拳跳舞學校，教導最熱愛嘅拳擊及跳女團舞，由於經已累積到一定客量，目標喺一年後唔使再租人場地，然後請老師教授，她就可以退居幕後結婚生仔，Regen嘅言論就觸及她的神經線。

Winkie開辦嘅泰拳跳舞學校奪得品牌獎項，她形容開心過獲樂壇獎項。

HotCha於2007年10月18日推出首張專輯《HotCha HotCha》。

34歲嘅Winkie準備結婚生仔，唔想被是非影響到將來。

不滿多年來被消費

Winkie強調自己唔係少少事發脾氣，爆seed絕對有理：「我開學校有我嘅客人，將來我老公有佢嘅親戚，我將來都會有小朋友，呢啲報道係一世㗎，將來小朋友問返『媽咪點解頂你唔順嘅？』咁我點教小朋友呀？」HotCha拆夥接近8年，Winkie極度不滿多年來一直被消費：「其實我經已忍咗4次，佢哋得閒就喺電台講吓，可能佢哋覺得講吓冇所謂，但唔知會傷害到我future，𠵱家已去到懸崖邊。」

Winkie為網台節目錄影，回應組合互數事件問題時多次爆喊。

抑壓多年，Winkie喺社交網上載千字文發洩。

4年前，Winkie提出搞HotCha《十周年回憶慈善演唱會》，尾聲時，三人齊爆喊。

人身安全受到威脅

Winkie更自爆過去10多年向朋友提及HotCha傷痛陰影都會崩潰爆喊：「由最初佢哋收埋練歌，我走音、跳舞甩步唔會提你，然後變本加厲喺其他人面前唱我蝦佢哋，真係好委屈好大壓力，其實我冇對人陰濕，只係有咩就攤開嚟講，結果乞人憎咗。其中一個隊友(Regen)去咗讀書HotCha改成二人組，少咗個中間人做協調，我嚴重抑鬱咗兩年，佢（張紋嘉Crystal）對自己冇自信，認定我係競爭對手就更加傷害我，係咁拮我嚟保護自己，就算組合分開咗都針住不停講我壞話，傷害我名聲，仲煽動身邊朋友唔鍾意我，打完《G1格鬥會》之後感覺人身安全受到威脅，因為有4個女仔係佢哋嘅朋友，第一場經已畀鄧小姐(鄧穎芝)打爆缸，好記得其中一個對手好狠話要拗斷我隻手，所以我放棄繼續比賽，呢幾個女仔係危險嘅，朋友都提醒我要小心佢哋。」

HotCha變二人組合時，Winkie成為咗Crystal最大勁敵。

Winkie眼中，Crystal同Regen多年嚟搞咗唔少小動作，但後者較為善良。

《G1格鬥會》比賽節目，Winkie第一場對手係鄧穎芝，兩人互不留手。

Crystal推出處女散文集邀得老友鄧穎芝充當攝影師。

Winkie展示當時傷勢，被對手打到傷痕累累。

Winkie已block兩位舊隊友電話號碼求過美滿人生：「其實我人生冇乜負面嘢，只係唔好彩遇到呢班人，亦求佢哋可以完全忘記我，咁我安全就ok喇。我鍾意HotCha呢隊組合，但對兩個隊友係唔開心同失望嘅，不過都感激佢哋激發到我進修，帶畀我堅毅精神。」她強調大家要放棄對HotCha嘅集體回憶，更叫大家轉睇女團COLLAR。