独家丨黎美言封锁旧队友手机号码过新生活终极爆料轰被张纹嘉搞到抑郁

2022-05-13 07:00

前女子组合HotCha成员张惠雅（Regen）接受电台访问时力数黎美言（Winkie）性格好烦兼难顶，被焫㷫的Winkie忍无可忍，向《头条日报》记者公开收埋心底15年嘅郁结，力斥除咗被两位旧队友张惠雅及张纹嘉（Crystal）伤害名声外，连人身安全都受到威胁：「两人身边嘅朋友骚扰我生活，𠵱家要借用媒体力量嚟保护自己！」她直言已封锁Regen及Crystal电话号码，希望能安心重过新生活。对于Winkie言论，截稿前两位旧队友未有回应。采访：方骞平摄影：沈健程场地：富德红人堂

Winkie形容自己处于悬崖边，自言本性善良嘅佢迫于反击。

Winkie自爆提及HotCha感到伤痛。

HotCha于2007年出道，14年拆夥，黎美言由艺人转型从商6年，开办泰拳跳舞学校，教导最热爱嘅拳击及跳女团舞，由于经已累积到一定客量，目标喺一年后唔使再租人场地，然后请老师教授，她就可以退居幕后结婚生仔，Regen嘅言论就触及她的神经线。

Winkie开办嘅泰拳跳舞学校夺得品牌奖项，她形容开心过获乐坛奖项。

HotCha于2007年10月18日推出首张专辑《HotCha HotCha》。

34岁嘅Winkie准备结婚生仔，唔想被是非影响到将来。

不满多年来被消费

Winkie强调自己唔系少少事发脾气，爆seed绝对有理：「我开学校有我嘅客人，将来我老公有佢嘅亲戚，我将来都会有小朋友，呢啲报道系一世㗎，将来小朋友问返『妈咪点解顶你唔顺嘅？』咁我点教小朋友呀？」HotCha拆夥接近8年，Winkie极度不满多年来一直被消费：「其实我经已忍咗4次，佢哋得闲就喺电台讲吓，可能佢哋觉得讲吓冇所谓，但唔知会伤害到我future，𠵱家已去到悬崖边。」

Winkie为网台节目录影，回应组合互数事件问题时多次爆喊。

抑压多年，Winkie喺社交网上载千字文发泄。

4年前，Winkie提出搞HotCha《十周年回忆慈善演唱会》，尾声时，三人齐爆喊。

人身安全受到威胁

Winkie更自爆过去10多年向朋友提及HotCha伤痛阴影都会崩溃爆喊：「由最初佢哋收埋练歌，我走音、跳舞甩步唔会提你，然后变本加厉喺其他人面前唱我虾佢哋，真系好委屈好大压力，其实我冇对人阴湿，只系有咩就摊开嚟讲，结果乞人憎咗。其中一个队友(Regen)去咗读书HotCha改成二人组，少咗个中间人做协调，我严重抑郁咗两年，佢（张纹嘉Crystal）对自己冇自信，认定我系竞争对手就更加伤害我，系咁拮我嚟保护自己，就算组合分开咗都针住不停讲我坏话，伤害我名声，仲煽动身边朋友唔锺意我，打完《G1格斗会》之后感觉人身安全受到威胁，因为有4个女仔系佢哋嘅朋友，第一场经已畀邓小姐(邓颖芝)打爆缸，好记得其中一个对手好狠话要拗断我只手，所以我放弃继续比赛，呢几个女仔系危险嘅，朋友都提醒我要小心佢哋。」

HotCha变二人组合时，Winkie成为咗Crystal最大劲敌。

Winkie眼中，Crystal同Regen多年嚟搞咗唔少小动作，但后者较为善良。

《G1格斗会》比赛节目，Winkie第一场对手系邓颖芝，两人互不留手。

Crystal推出处女散文集邀得老友邓颖芝充当摄影师。

Winkie展示当时伤势，被对手打到伤痕累累。

Winkie已block两位旧队友电话号码求过美满人生：「其实我人生冇乜负面嘢，只系唔好彩遇到呢班人，亦求佢哋可以完全忘记我，咁我安全就ok喇。我锺意HotCha呢队组合，但对两个队友系唔开心同失望嘅，不过都感激佢哋激发到我进修，带畀我坚毅精神。」她强调大家要放弃对HotCha嘅集体回忆，更叫大家转睇女团COLLAR。