姜濤誕︱包電車賀偶像生日近300姜糖集結銅鑼灣恐違禁聚令

2022-04-30 13:30

為慶祝MIRROR成員姜濤的23歲生日，香港後援會除了響應偶像姜濤的呼籲做善事幫助有需要的人之外，更耗資七位數字籌備多項生日應援，其中更贊助本港今年首個「免費乘車日」，請香港市民免費搭電車。首班車今早十一時由屈地街電車廠開出，一眾「姜糖」齊集一起出發！

現場可見電車站佈滿印有姜濤的裝飾，登上電車前，「姜糖」們首先在電車站拍攝大合照、領取免費乘車日獨家紀念品。其後開始電車巡遊，車上的「姜糖」們與路上的「姜糖」打招呼，更有人大叫：「姜濤生日快樂！」整段電車路人頭湧湧。而當「姜濤號」使入銅鑼灣時更一度淪陷，姜糖熱情度爆燈，吸引近300名市民聚集行人路，個個舉機影相，場面墟冚。不過，就令人憂慮姜濤們踩界觸犯599G《預防及控制疾病（禁止羣組聚集）規例》，據了解後援會日前已收到警方通知，呼籲要小心留意人群聚集問題，而今日警車亦有在現場戒備。

銅鑼灣淪陷一樣，逾300人等候「姜濤號」電車經過，即時打卡。

警方一度到場。

去到邊都係咁多人。

姜糖一早就到電車站等第一班開。

姜濤公仔，方便打卡。

「姜濤號」駛經之處都吸引大批姜糖圍觀，但恐違禁聚令。

「姜濤號」內有好多不同偶像精品。

仲有好多汽球裝飾。

個個都要舉機影相。

一向忙碌的姜濤早已透露生日需要在工作中度過，正在拍攝《季前賽》的他也不忘抽空拍攝了一段短片感謝「姜糖」們。姜濤說：「首先好多謝大家一直以來對我生日嘅，尤其是今次見到大家好用心地準備我23歲嘅生日，所以發自內心多謝大家。其實我嘅生日願望好簡單，我諗好多人都係一樣，希望疫情快啲過可以回復返正常生活。喺疫情期間，希望大家都可以充滿愛、互相幫助，一起渡過呢段艱難嘅時候，咁我哋就可以快啲去旅行。再次希望所有人身體健康，所有支持我嘅fans姜糖們，你哋都可以永遠幸福。」