Winka自爆期待同COLLAR成員嘈交被笑似達達星人感自責

2022-04-29 19:30

23歲COLLAR成員Winka（陳泳伽）參加《全民造星IV》時，已經勁晒歌喉，因此加入COLLAR後，Fans都期待Winka可以快啲有Solo歌。而日前她作客網上節目《MusicPanda》，與鄭欣宜（Joyce）和馮允謙（Jay Fung）兩位實力派唱將切磋，同場都沒有被比下去，網民都大讚聽出耳油。

Winka與Joyce、Jay Fung作客網上音樂節目。

Fans大讚好聽。

Winka在節目上被黃丹儀問及有否想過單飛更易發展？Winka坦言有諗過，「我未玩《造星IV》時係有咁諗，因為成日覺得一個人發展，可能好多嘢可以由自己話晒事。但我發現原來做藝人，尤其我呢啲比較新，有好多嘢唔係自己一個人可以完全消化得晒。多幾個人陪你就會冇咁多情緒，可以冷靜啲，佢哋喺隔離我就會好安心。」KB又問到成軍約3個月，暫時來說有冇是非？Winka表示：「其實真係冇，但我期待我哋嘈交嘅。」因為她認為嘈交可以令大家感情更好，「可以更了解大家嘅底線。」

至於同團中邊個最friend，Winka就好有自信話同個個都好friend，「佢哋會同我傾心事，我又好願意分享。」對於出道造型被網民笑似達達星人，Winka表示：「其實我無所謂，我而家都鍾意咗人哋話我似達達星人，一開始我有唔開心咗一兩日，第一係覺得我真係咁似怪獸咩，第二係覺得有啲對唔住團隊，因為好似佢哋將覺得最好嘅嘢擺上我身，但我Carry唔到佢哋擺嘅嘢。」不過Winka非常識諗，話要化危為機，可能好多人一時間未接受到她剪短頭髮，認為久而久之人們就會接受。

COLLAR出道3個月，人氣甚高。

Winka出道造型被網民笑似達達星人。

Winka對於造型被嘲笑，覺得好對唔往團隊。

Winka出道前不時在街頭Busking，其實她自小就很喜愛唱歌，早前於IG分享過小學參加歌唱比賽演唱G.E.M.（鄧紫棋）代表作《Where Did You Go》的影片，Fans都大讚她唱歌有天份，細細個已經好有功架。這日在節目中都有說起小學參加歌唱比賽的往事，「我細個其實冇一個認知我係鍾意唱歌，係小學嗰陣睇咗《超級巨聲》，我哋就諗住搞個歌唱比賽，然後個比賽名就直接叫《超級巨聲》，但係冇人參加，可能大家都怕醜，我班主任就叫我去參加。於是我就唱咗G.E.M.嘅《Where Did You Go》。」而Winka都即場清唱幾句，Jay Fung都大讚：「唔使評，咁好聽，啲轉音真係……因為呢隻歌都難唱嘅。」而Joyce都好欣賞Winka的歌喉，「我覺得佢心中有節奏，同埋我喺佢唱嗰陣望佢面前堆紙冇《Where Did You Go》歌詞，我覺得好神奇，點解佢可以記得晒啲歌詞。」表示對Winka的記性好佩服。

View this post on Instagram

A post shared by (๑˘ ₃˘๑) WINKA 陳泳伽 ∞ (@winka_chan)

小學參加學校歌唱比賽唱《Where Did You Go》。

Winka同兩位前輩合唱都冇被比下去。

之後二人都分別同Winka合唱，Joyce話好過癮，又憶起與Jay Fung曾一同做《造星IV》評判，當時已經覺得Winka唱得好好，「我啱啱聽佢唱《記憶棉》有留意佢個嘴，佢唱歌技巧好過我添！我唔會覺得佢係個小妹妹囉。」Winka話會將兩位前輩對她說的話寫進日記，當自己迷失時再回看，把這些話當強心針，Joyce都覺得她很可愛。