姜濤嚮往發哥現有生活模式預告30歲後或轉型做演員

2022-03-31 21:30

姜濤下月底將迎來23歲生日，近日他接受加拿大A1中文電台《薛聽音樂》訪問，談到入行近4年，姜濤自覺思想愈來愈成熟，比起入行時少了一份天真。姜濤又坦言自己不適合太長時間留在娛樂圈：「我未必會喺呢一行stay得好耐，呢個係我一直以嚟都有同大家講嘅一件事。可能除咗上舞台之外，呢一行嘅其他嘢唔係好適合我。」

是否因此想提早退休？姜濤說︰「係呀，其實係真㗎，我想將最好嘅時光留低，之後就過番一啲安靜嘅生活，可能因為呢一行太唔安靜。」姜濤坦言初入行時沒想太多，但已經有直覺自己不太適合：「身邊嘅人都會話，你愈入得耐你愈放唔低，但我反而愈入得耐愈想放低。」他直言嚮往周潤發的生活，既可以過着平凡的生活；間中又可以拍戲，姜濤更揚言有考慮30歲後轉型：「可能我過咗30歲之後會轉行做演員，或者幕後都唔定。可能個人經歷得多咗，對做演員有更加大幫助。」

姜B下月便迎來23歲生日。

訪問中姜濤覺得自己性格並不適合娛樂圈。

不諱言30歲後可能主力在演戲或幕後發展。

響往發哥現在的生活模式。

若做演員可能要飾演醜角或肥仔角色，姜濤笑言：「我一定好容易變番肥仔，我就ok，但我公司就未必接受到，因為要好長時間先可以減番；但如果做醜角，我覺得冇乜所謂，以前包袱比較重，但依家對演戲了解多咗，演戲係另一個專業，你要做到嗰個角色，都冇話唔得嘅。」談到處男電影《阿媽有咗第二個》，姜濤透露在戲中飾演外賣仔，被毛舜筠發掘成為藝人，他表示初次跟毛姐及導演彭秀慧合作有壓力：「我拍戲經驗比較少，但同佢哋傾完偈之後冇咁大壓力，可能我份人冇咁易打開心扉，前期比較封閉自己，後期合作就愈嚟愈好。」

至於近日拍攝的Viu劇集《季前賽》，姜濤說是他至今最喜歡的劇集，很開心可以寓工作於娛樂，他又大讚隊友邱士縉（Stanley）和陳卓賢（Ian）球技出色，而呂爵安（Edan）亦有進步，反令他對自已的球技信心下降，最後姜濤更大讚Ian才是「真男神」，讀書叻運動又叻，令人羨慕。