古天后日誌｜港股成交暫未配合 二萬二水平先作整固

3月31，部份時間有陽光，下午炎熱，留意明日顯著轉涼，周末期間較為清涼。俄烏局勢有所緩和，不過雙方談判仍未有突破，加上美國就業數據偏好，支持聯儲局放鷹，美股借勢回吐。道指跌65點；標指趶9點；納指跌177點。有分析指美股自3月14日至周二收市計，持續反彈，標指累計回升11%，但由於宏觀局勢及聯儲局放鷹，將不能支持股市實現持續上升。而聯儲局樂見更收緊嘅金融條件，有助打擊通脹。實際上，這意味不利風險資產，並警告東歐局勢緩和，雖能減低經濟增長風險，但亦為聯儲局提供加快收緊幣政策機會。

至於港股由21200點回升至噚日22200點，回升約千點，但成交額並未見得配合，呢幾日成交額未見重返1800至2000億水平，可見資金未有積極入場，而大市亦面對住短線超買問題，後市要繼續向上，可能要喺22000水平進行整固。

美國證交會(SEC)周三宣布，已將幾家公司添加到其《外國公司控股責任法案》(HFCAA)臨時名單中，當中主要係中概股，意味到呢啲公司面對住美國除牌風險。遭SEC列入該名單的包括中國互聯網巨頭百度、中國海鮮公司Nocera、中國證券商富途控股、中國娛樂企業愛奇藝，以及美國生物製藥巨頭CASI Pharmaceuticals。換句話講，中概股嘅危機未解除，相關重磅科技股難免受影響，預期將持續波動。

不過ATMJ呢幾隻指數權重股，已於月中成功尋底，其後受到冚倉盤入場，回補大量沽空盤下急彈，反彈幅度相對低位有兩三成升幅，嚟到現水平，開始整固亦正常。騰訊(00700)阻力喺380至400；美團(03690)阻力160-180，京東(09618)阻力260-280，阿里(09988)阻力115-120；要突破阻力需時，相信暫時喺阻力之前，呢幾隻重磅科技股，開始要進行整固。

至於古天后認為最壞時間已過嘅內房股，能夠如期公布業績嘅，證明財務狀況較佳，而之前點名不能沾手嘅恒大(03333)一如所料未能如期公布業績，融創(01918)未能如期公布業績之餘，更預告明日停牌。所以就算內房股已捱過最壞時間，亦並非每一間公司可以安然渡過行業今次嘅債務爆煲危機。之前古天后力薦嘅民企內房碧桂園(02007)已順利公布業績，業績表現跟唔錯，債務狀況跟派息有改善，股價噚日一度升近一成，已重返6元水平。短線預期股價要喺6元水平整固，中線目標重返7元之上不變。

古天后

(徐狄怡，證監會持牌人)